Jehennet WAS, d’Hébuterne

(AD59, B1738, folio 123)

En 1525 à Hébuterne, Jehennet WAS tue d’un coup d’épée son beau-père Michiel REMOND qui voulait l’empêcher de rentrer chez lui en l’insultant et le frappant avec une fourche.

Charles, etc, savoir faisons à tous présens et advenir, nous avoir receu l’umble supplicacion de Jehennet WAS, jeune filz à marier demourant au villaige de Helbuterne, en notre pais d’Artois, contenant comment le XX^e jour de novembre dernier passé, que ledit suppliant estant en la maison de sa mère, où il a tousiours fait sa résidence, Michiel REMOND à présent deffunct lequel avoit lors espousé sadite mère, avec laquelle il se conduisoit très mal et lui vendoit et despendoit journellement son bien, vint busamer à la porte de ladite maison. Et en addreschants ses parolles audit supliant lui dit : wide hors traître, filz de ribaulde, je te feray chier en ta maison et pluiseurs autres parolles mauvaises et déhonnestes. Sur quoy ledit suppliant, qui estoit assez accoustumé souffrir de lui, lui dit qu’il rentrast en ladite maison et qu’il estoit tardt car il étoit aprez dix heures du soir. Et non pensant que ledit feu Michiel lui deust faire quelque mal, alla lui mesmes ouvrir la porte sans verge ne baston. Mais incontinent que ladite porte fust ouverte, ledit feu, jurant et attestant le nom de Dieu, comme la mort et sang et autres sermens exécrables, vint vers ledit suppliant estant en la court d’icelle maison et illecq sans quelque occasion, frappa d’une fourque qu’il tenoit en ses mains icellui suppliant, tellement que dudit coup il fut abbatu par terre. Ce fait, se relleva et se cuida saulver en ladite maison, mais ledit deffunct Michiel le reffrappa et abbatist de rechief sur le soeul d’icelle maison. Quoy voiant icellui suppliant print son espée et wuida d’icelle maison. Mais ledit deffunt, non se contentant de ce, alla tousiours aprez ledit suppliant, lequel pour garandir sa vie, lancha un coup seullement aprez ledit feu Michiel, lequel en fust touchié en la poitrine. Tellement que dudit coup par faulte de brief secours, on appareil ou autrement, termina tantost aprez vie par mort.(…)

Donné en notre ville de Malines l’an de grace mil V^C XXVI et de noz règnes assavoir des Romains etc le IX^e et de Castille etc le XI^e ; par l’empereur en son conseil ; signé VERDE RUE.