Anthoine VERDIERE, de Sombrin

(AD59, B1740, folio 164v)

En 1528 à Arras, au cours d’une querelle entre soldats après un repas, Anthoine VERDIERE tue Pierre DESGARDINS après avoir été blessé à la main d’un coup d’épée dudit Pierre.

Charles etc, savoir faisons à tous présens et avenir, nous avoir receu l’umble supplication d’Anthoine VERDIERE, povre simple homme champestre demourant ou villaige de Sombrin en notre pays et conté d’Artois, contenant comment, obstant les guerres quy ont lieu entre Nous et le Roy de France et la situation dudit lieu de Sombrin, lequel est frontier et limitrophe distant de la frontière de France d’une lieuwe ou environ, à cause de quoy ledit suppliant n’auroit peu bonnement faire sa besoigne comme il avoit accoustumé faire en temps de paix, il se seroit mis en notre service de guerre.

Et estant en garnison en notre cité lez notre ville d’Arras soubz la charge du seigneur de Habarcq, gouverneur et capitaine de nosdites ville et cité, il se feust olt environ ung an ou moys d’avril dernier passé, trouvé en icelle cité entre quatre et cincq heures aprez midy, avec aucuns autres ses compaignons de ladite garnison, avec lesquelz il avoit ledit jour bancqueté, entre lesquelz estoit à présent défunct Pierre DESGARDINS, homme en son vivant assez hautain et noyseulx, lequel estoit vestu d’un sayon ou paltocq de drap gris et avoit une espée ou verdun à son costé. Et eux estans au plus prez de la porte de notredite ville d’Arras, du lez et costé d’icelle cité, commencèrent avoir noise entre eulx et parlans haultement l’un à l’autre entrèrent au bolluwerch de ladite porte, où lors ilz desgainèrent leurs espées ou verduns, en frappant et ruans aprez l’un l’autre. Combien qu’il suppliant se garandist de la chaîne du pont de ladite porte, il fut néantmoins attaint d’un coup de taille en l’une de ses mains, dont il fut bleschié et affolé d’aucuns doiz. Quoy sentant par luy et meu de chaulde colle, de son espée qu’il avoit desgainée, rua et lancha pluiseurs cops aprez ledit DESGARDINS, lequel feut bleschié de deux cops d’estoc en deux parties de son corps, à cause desquels par faulte de bon et soudain appareil icelluy DESGARDINS aucuns jours aprez termina ses jours. (…)