Jehan LE TONNELIER, à Gaudiempré

(AD59, B1741, folio 187)

En 1527 à Gaudiempré, Pierre FERU est tué d’un coup d’épée par un inconnu après avoir semé le trouble en dansant à la fête dudit lieu. Jehan LE TONNELIER, mêlé à cette affaire, déclare ne pas être responsable de l’homicide.

Charles etc, savoir faisons à tous présens et avenir, nous avoir receu l’umble suplicacion de Jehan LE TONNELIER, povre simple homme saietteur de son stil, nagaires résident en notre ville d’Arras, contenant que le second jour de septembre l’an XV^C XXVII, ledit supliant se seroit trouvé à la feste du villaige de Godiempré en Artois, où estoit lors résident Mathieu CORNILLOT à présent défunct beau-père dudit supliant, à intencion de ilec se aller esbatre et faire bonne chière avec ses parens et pluiseurs autres personnes des villaiges voisins, tous illecq assemblez pour eulx conjoyr avec leurs parens ou semblables. Arrivèrent à présent défunct Pierre FERU et ung nommé DURAN son compaignon du villaige de Monchiet en la place où se faisoit la dansse et esbatemens, lesquels Pierre FERU et sondit compaignon commencèrent la dansse et esbatemens avec chacun une josne fille, comme faisoient aucuns compaignons ilec arrivez. Mais pour ce qu’ils vouloient avoir leurs dansses à part, et ne se voulloient atacher avec les autres qui danssoient comme il est acoustumé faire, leur fut remonstré et pryé par ung josne filz dudit Godiempré nommé Pierre CORNILLOT qui avant se retira de la feste, qu’ils se voulssissent rigler faire la feste et dansser comme les autres sans riens faire de nouveau, lequel Pierre FERU auroit dit et respondu qu’il n’en feroit riens et danseroit du tout à son plaisir en despit de ceulx qui en vouldroient parler, soy vantant qu’il ne se départiroit point de ladite feste sans y esmouvoir quelque noise ou débat, et en bouteroit aucuns en l’autre monde où il y seroit bouté affirmant ainsi le faire. Et ce environ cincq heures du soir, quoy oiant par ledit supliant dit audit FERU ces motz : mon Dieu qui te laisseroit faire et batrois assez. Sitost lesdites parolles proférées, sans aucunement estre provocqué à yre, ledit FERU dict audit supliant : morbleu en veux tu parler c’est à toy que je veulx. Et en disant ces motz lesdits FERU et DURAN son compaignon desgainèrent leurs espées et assaillirent ledit supliant lequel se mettant à deffence desgaina son espée et en destourna pluiseurs cops, tant qu’en desmarchant il se laissa tomber par terre à la renverse. Et luy ainsi tombé, ledit FERU rua ung cop d’estocq sur ledit supliant dont il fut navré en la cuisse et cuidoit iceluy FERU l’avoir atteint au corps et homicidé. A cette cause retourna vers ledit DURAN son compaignon qui estoit envahy d’aycuns autres compaignons et comme ledit FERU cuidoit tourner en son ayde après que ledit TONNELIER suppliant se feut relevé et se rendit fugitif se laissa subit ledit FERU tumber le visaige en terre tout mort, dont chacun s’esbahit obstant que nul ne savoit qui avoit donné le cop qui estoit d’estocq en la poictrine, parce qu’il y avoit d’autres compaignons qui avoient leurs espées desgaynées et ce faict chacun s’absenta et retira.

Et combien qu’iceluy suppliant ne scet et n’entend point avoir donné ledit cop, ne par peine iceluy cas néantmoins obstant qu’il avoit esté de l’encommencement d’iceluy, craindant rigeur de justice, il se seroit absenté du pays et n’oseroit retourner, hanter ne converser, se notre grace et miséricorde ne luy feust premiers sur ce impartie, pour laquelle il nous a très humblement supplié et requiz. (…)

Donné en notre ville de Malines ou lois de may l’an de grace mil cinc cens et trente, et de noz règnes assavoir des Romains etc le XII^e et de Castille etc le XIIII^e ; soubscript par l’empereur en son conseil ; signé DELANGHE.