Adrian TETTELIN, à Maroeuil

(AD59, B1734, folio 7v)

En 1521 à Maroeuil, Adrian TETTELIN est accusé, au cours d’une querelle au cabaret où les présents ont consommé trop de cervoise, d’avoir tué son compagnon Bétremet de BOUBERS. Etant qu’un autre participant au délit s’est enfui après le meurtre il est possible qu’il ne soit pas coupable.

Charles etc, savoir faisons à tous présens et avenir, nous avoir receu l’umble supplicacion de Adrian TETTELIN de notre pays d’Artois, homme de guerre de noz ordonnances, contenant comme il soit ainsi que le XXII^e jour du mois de décembre dernier passé, ledit Adrian se seroit délébéré d’aller boire avec ung nommé Liévin de LALLÉE carton et ung nommé Bétremet de BOUBERS à présent deffunct, tous demourans au villaige de Marouel et pour ce faire se partirent dudit Marouel eulx trois ensemble, environ le soir et s’en allèrent tout devisant et jouant aimablement sans mal penser l’un à l’autre, jusques en la maison d’un nommé Jehan BELLEUVRE cabartier demourant au villaige de Louez distant dudit Marouel d’un quart de lieue ou environ. En laquelle ilz trouvèrent ledit cabartier et Guillemin BELLEUVRE son frère, lesquelz ilz requirent les vouloir compaignier, ce qu’ilz firent, ce assirent à table tous ensemble sans quelques mauvaises parolles, jusques au compter de ce qu’ilz avoient despendu qui estoit de quatre solz tant seulement. Et aprez ledit escot compté, icellui Liévin de LALLÉE demanda encoires quatre lotz de cervoise. Et en les buvant y eust d’un costé et d’autre pluiseurs parolles entre lesquelles ledit Liévin dit qu’il ne craindoit et n’avoir peur de six hommes de Marouel. Ausquelles parolles ledit Adrian suppliant dit audit Liévin qu’il devoit estimer ung autre comme luy. Et alors ledit Liévin lui dit qu’il en prinst cincq et qu’il fusist le sixième. Et lors ledit Liévin se leva de la table comme aussi fist ledit Bétremet et s’en allèrent hors dudit cabaret et eulx retournez audit cabaret commencèrent à ruer sur ledit Adrian supliant et lesdits Jehan et Guillemin BELLEUVRE, assavoir ledit Liévin d’une espée nue qu’il tenoit en ses mains, et ledit Bétremet d’une fourche. Et ce voiant par icellui Adrian et le dit Jehan BELEUVRE se deffendirent et fist tant ledit Jehan qu’il wyda hors de ladite maison et ledit Adrian demoura audit cabaret, lequel se deffendoit contre ledit Liévin qu’il prinst par le collet de son pourpoint et l’abatist par terre et rompit son espée icellui Liévin en chéant. Et si estoit wydé hors de ladite maison icellui Bétremet pendant ledict conflict comme aussi fist tost aprez ledit Liévin. Et aprez que ledit Liévin fut widié icellui Adrian suppliant commencha à cercher et quérir son bonnet que lui avoit fait tumber jus de la teste. Et quant il l’eust trouvé, wida hors de ladite maison à intencion de savoir qu’estoient devenuz lesdits BELLEUVRE et lui estant widié hors, oy ledit Guillemin lequel disoit audit Jehan son frère ces motz : tu l’a assommé. Ce oiant estre advenu, icellui Adrian s’est retourné couchier. Et depuis il a sceu que ledit Bétremet estoit mort et que on le chargeoit de ladite mort, combien qu’il n’en feust coulpable en tant qu’il n’estoit présent à ce faire et qu’il n’y avoit que lesdits deux frères Jehan et Guillemin BELLEUVRE hors dudit cabaret, lequel Jehan BELLEUVRE s’est rendu fugitif. Néantmoins, doubtant rigeur de justice, ne se ose retourner en sa garnison d’Aire, mais force lui est de soy absenter de noz pays là où il n’oseroit jamais retourner estre ne converser ains lui conviendroit finer ses jours en estranges pays et contrées se notre grace et miséricorde ne lui estoit sur ce impartie dont attaendu ce que dit est, et qu’il a tousiours esté homme de bonne vie fame et renommée il nous a humblement supplié et requis. (…)

Donné en notre ville de Malines oumois de mars l’n de grace mil cincq cens vingt et deux et de noz règnes assavoir de cely des Romains et de Hongrie le IIII^e et des Espaignezs le VII^e ; ainsi signé par l’empereur à l’ordonnance de madame la gouvernante et du conseil ; signé DARDENNE.