Bonnaventure de SOUASTRE, à Arras

(AD59, B1734, folio 53v)

En 1523 à Arras au sortir d’un cabaret, Bonnaventure de SOUASTRE prend la défense d’un compagnon agressé par plusieurs autres dont Ganet JULIEN. Ce dernier est tué d’un coup d’épée, mais par qui ?

Charles etc, savoir faisons à tous présens et avenir, nous avoir receu l’umble supplication de Bonnaventure de SOUASTRE, escuier, prisonnier ès prisons de notre gouvernance de Lille, contenant comme samedi veille du Gras Dimenche de l’an XV^C XX ledit suppliant se trouva en notre ville d’Arras à intencion de veoir les jeuz et esbatemens qui se devoient faire audit jour du Gras Dimenche. Là où ledit jour de samedi ledit suppliant alla boire et menger en ung cabaret que l’on disoit au Pié de Beuf, avec ung compaignon de Saint Légier nommé Jehan NOLLET, auquel cabaret estoit ung nommé Ganet JULIEN que l’on disoit estre brasseur, à présent deffunct, avec pluiseurs autres compaingnons, entre lesquelz et ledit Jehan NOULLET, en wydant dudit cabaret, débat et question se meut. Quoy voyant par l’ostesse ou autre estant en ladite maison, dit audit suppliant que on tuoit son compaingnon. Que lors icellui suppliant wida aussi dudit cabaret et se mist à l’ayde dudit Jehan NOULLET et frappèrent par ensemble aucuns cops de leurs espées après leursdites parties. Tellement que ledit feu Ganet JULIEN receut ung cop d’estocq au corps, à cause duquel environ trois sepmaines après il termina vie par mort. (…)

Donné en notre ville de Malines ou mois de juillet l’an de grace mil cincq cens vingt et trois et de noz règnes assavoir de cely des Romains et Hongrie le quatriesme et des Espaingnes et autres le VIII^e ; ainsy signé par l’empereur en son conseil ; DUBLIOUL.