Robert CARPENTIER, à Arras

(AD59, B1736, folio 37v)

En 1524, à Arras, Jehan CARPENTIER rentre chez lui vers dix heures du soir, avoir avoir beaucoup bu. Il se dirige vers l’étable aux chevaux comme pour y brider un cheval. Son frère Robert arrive et se querelle avec lui. Leur mère venant voir ce qui se passe, est insultée par son fils Jehan. Celui-ci frappe alors sa mère et son frère avec une fourche. Après un échange de coups, Jehan meurt accidentellement, blessé par le couteau de son frère Robert.

Charles, etc, savoir faisons à tous, présens et avenir, nous avoir receu l’humble supplicacion de Robert CARPENTIER, josne filz à marier, demourant en notre ville d’Arras, contenant comme, le XXIIII^e jour de septembre dernier passé, ledict suppliant disna avec deffunct Jehan CARPENTIER son frère, Adrien OULTEL et autres, en la taverne du Chevalet d’Or, en ladicte ville, où ilz furent longue espase de temps, et jusques environ cincq à six heures du soir, qu’ilz retournèrent à leur maison pour soupper avec leur mère, tenant hostellerie au logis de l’Ours en icelle notre ville. Et en souppant ledict feu Petit Jehan trencha ung quartier d’une tarte qu’ilz avoient à leur soupper, disant qu’il en alloit faire ung présent à Hubert HÉRISSART et autres compaignons de guerres aventuriers qui estoient souppans en ladicte taverne du Chevalet d’Or. Ce que ledict suppliant eust vouluntiers empescher, disant à sondict frère qu’il n’estoit besoing y aller, ne faire ledict présent et qu’il avoit assez beu. Nonobstant lesquelles remontrances, ledict deffunct se partist d’illec et emporta ledict quartier de tarte ausdessus nommez en ladicte taverne, où il fust encoires longue espace de temps, et jusques environ dix heures en la nuyt qu’il retourna en ladicte maison du l’Ours. Et s’en alla en l’un des estables dudict logis deslier ung cheval appertenant à Hubert FRANÇOIS dit de Pas ou à son frère, lequel il faindoit vouloir brider. Et ledict suppliant le sievyst, entrant audict estable, soy donnant merveilles, luy demandant ce qu’il vouloit faire, disant à son dict frère qu’il ne savoit en tel estat brider ledict cheval, lequel se commença à tourner et déjetter, ruer et eslever, de sorte que ledict suppliant fut contraint soy saulver en la mengeoire dudict estable. Pendant lequel temps où le bruyt et murmure estant audict estable, y survint leurdicte mère hostesse de la maison, demandant audict deffunct quel chose il voloit faire. A quoy il respondit très arogamment : va, vielle meschante femme, va t’en coucher, tu n’as icy que faire. Ce oyant, ladicte mère print un fourquette estant audict estable, disant audict deffunct : vien ça, meschant garchon, te ay te nourry si longuement pour me venir iniurier et vilipender. Et non content, ledict deffunct arracha sa dicte mère ladicte fourquette, et l’abbatist par terre si rudement qu’elle fut deschevelée très inhonnestement. Et lors commença à cryer après ledict suppliant à son aide, disant : ce garchon nous tuera il tous ? Auquel cry pour garander sadicte mère, et éviter que ledict feu ne lui feist plus grand meschief ou desplaisir, icellui suppliant wida de ladicte mengeoire, s’approcha et releva sadicte mère et dit audict feu son frère : mon Dieu, que tu es ung terrible valeton, que veulx tu faire. Oyant lesquelles parolles ledict feu frappa ledict suppliant de ladicte fourquette, sy grant coup qu’il l’abbatit par terre et la rompist sur luy. Et après le suppliant se releva et pour la tincion et deffence de son corps et de sadicte mère, tira son cousteau le tenant en sa main pour donner terreur audict feu, affin qu’il se déportast de plus l’envayr, néantmoins ne désister de son mauvais vouloir, ains s’efforça de plus en plus de frapper et oultrager ledict suppliant de l’autre bout de ladite fourquette qui estoit demourée en sa main, mesmes s’approcha ledict suppliant frappant et le poursuyant de si près qu’il ne se savoit où sauver, et fut contraint soy retirer et sauver en l’allée de ladicte estable, où il fut de rechief poursuy par ledict feu à tout ledict baston. Lequel en frappant après ledict suppliant, de sorte et radeur qu’il marchoit et frappoit, glissa et cheut sur icellui suppliant tenant son cousteau comme dit est. Et tost après se releva et recula quatre ou cinq pas arrière dudict suppliant, disant qu’il estoit fort blesché. Et a ledict suppliant ouy dire que trois ou qutre heures après ledict Petit Jean ala de vie à trespas, ayant une playe dessus sa mamelle comme ledict suppliant a entendu. (…)

Donné en notre ville de Malines, ou mois de janvier l’an de grace mil cincq cens vingt et quatre, et de noz règnes assavoir des Romains et Hongrie le VII^e et des Espaingnes le IX^e ; ainsi escript sur le reply par l’empereur en son conseil ; signé de ZOETE.

[se donner merveilles = s’étonner ; envahir = attaquer]