En 1493 à Arras, Adem RICQUIER ayant mis ses chevaux dans une étable à Arras, apprend que quelqu’un a mis le feu à un fumier situé devant cette étable. Il revient sauver ses chevaux avant qu’ils ne soient asphyxiés, et se querelle avec Bauduin de TILLOY responsable présumé de cet incident. S’ensuit une rixe où ce dernier est blessé mortellement à coups d’épée. La lettre de rémission est signée de Maximilien père de Charles Quint.

Maximilien et Philippes, etc, savoir faisons à tous présens et avenir, nous avoir receu l’umble supplication de Adem RICQUIER, natif du Pont à Raisse en l’eschevinaige de notre ville de Douay, et homme de guerre de la garnison de notre ville d’Arras soubz notre amé et féal cousin Robert de MELUN seigneur de Rouvy, contenant comme ledit supliant aient tout le temps de leur vie servy en armes la maison de Bourgoingne et aussi nous Roy depuis que nous sommes venuz ès pays de par deçà, esquelz services ilz ont exposé leurs corps et biens, en façon qu’ilz en sont devenuz povres. Or est il que environ à ung mois ledit supliant estant logié sur le grant merchié de notredite ville d’arras, après qu’il fut retourné d’une coursse que lui et aulcuns compaignons de ladite garnison avoient faite, mist ses chevaulx en son estable qui est ung celier de l’ostel de la Teste Noire, aiant entrée et yssue sur ledit grant merchié. Et après qu’il les eust fait mectre à point, s’en ala sur ledit merchié ou environ ung heure après, lui fut raporté que l’on avoit bouté le feu en ung fumier estant devant l’entrée du cellier où estoient sesdits chevaulx et que sesdits chevaulx estoient en dangier d’estre estains de la fumée qui entroit dedens ledit celier. Que ce oyant, ledit supliant ala diligemment devers sesdits chevaulx et trouva qu’ilz estoient en tel danger que s’il n’eust coppé les lyecolz et hastivement les emmenez sur le marchié, ilz euseent esté mors et estains. Que ce fait, icelluy supliant de ce esmeu se tira devers ung gorrelier son voisin, auquel il demanda s’il avoit bouté le feu oudit fumier. Sur quoy il respondi que non et que ce avoit esté ung marissal son compère, nommé Bauduin de TILLOY. Et ce oy ledit supliant et ledit gorrelier s’en alèrent devers ledit Bauduin, auquel ledit supliant demanda pourquoy il avoit ainsi bouté ledit feu, lui disant que c’estoit mal fait, à quoy il respondit qu’il ne l’avoit point fait. Et ledit gorrelier son compère lui dist qu’il le avoit fait et non autre. Et lors ledit Bauduin dist ces parolles ou en substance : et bien quant je l’auroye fait, je le feroye se l’avoit encore à faire, et ne voy homme pour que je le deusse laisser à faire. Sur quoy ledit supliant luy dit que c’estoit mal fait, et que se ledit fumier l’empeschoit, il s’en devoit plaindre à justice et que s’il avoit beaucop de telz voisins qui lui vouslsissent faire telz desplaisirs, il diroit bien d’eulx. Et ledit Bauduin dist audit supliant : en votre museau. A quoy icelluy supliant respondi : Bauduin autrefoiz vous m’avez quéri et volu faire desplaisir que j’ay enduré, et me déporte vous quérir. Sur quoy ledit Bauduin luy dist qu’il avoit menty. Lequel supliant se voyant ainsi desmenty de chaulde colle donna un cop du plat de son espée dedens le fourreau qu’il tenoit en sa main audit Bauduin sur son espaulle. Et icelluy Bauduin tira ung espée qu’il avoit et courut après ledit supliant, qui tousiours reculla jusques cermy le marchié. Mais ce nonobstant ledit Bauduin cuidant occir ledit supliant lui donna deux cops à sang courant et playe ouverte, dont de l’un il luy percha le bras droit parmi le beuste et l’autre parmy le genoul de sa jambe enclenché, en le chassant et batant par telle manière que icelluy supliant pour sauver sa vie se miste à deffence, et en soy deffendant donna audit Bauduin aucuns cops de son espée, qui en deffendant se desgaina. Et néantmoins ledit Bauduin persévéra tousiours de le chasser et lui courut suz jusques ung Almant y survint, qui mist sa picque entre eulx deulx et les sépara. Et à tant se partirent l’un de l’autre. Et combien que ledit Bauduin ne fut fort bléchié, néantmoins environ quize jours après, par faulte de bonne garde conduite ou autrement ala de vie à trespas. (…)

Donné en notre ville de Malines ou mois d’avril l’an de grace mil IIII^C IIII^XX et XII après Pasques, et des règnes de nous Roy assavoir de celui des Romains le VIII^e et desdits de Hongrie etc le troizième ; ainsi signé par le Roy à la relation du conseil ; signé de Hondecoutre.