Charles de REUBEMPRÉ, à Arras

(AD59, B1733, folio 44)

En 1522 dans une taverne d’Arras, le bâtard de Licques homme de guerre querelleur et de caractère emporté, prend un repas en compagnie d’un homme de Douai, à qui il veut faire payer tout l’escot, Pierre RABY étant parti sans payer. S’ensuit dans la rue plusieurs rixes car ledit bâtard de Licques veut absolument occire ledit homme de Douai et s’en prend à ceux qui le défendent. Ledit bâtard finit par être tué d’un coup d’épée, mais par qui ?

Charles etc, savoir faisons à tous présens et avenir, nous avoir receu l’umble supplicacion de Charles de REUBEMPRÉ, homme d’armes soubz la charge de notre très chier et féal cousin le conte de NASSOU, contenant comme le mardy VIII^e jour du mois de juillet dernier passé, feu le bastard de LICQUES homme de guerre comme l’on dit soubz le conte de FAULQUEMBERGUES seigneur de Lignes, estant avec autres au disné en certaine taverne où pend pour enseigne le Croissant d’Or sur le grant marchiet de notre ville d’Arras, où estoit semblablement ung compaignon de guerres lequel, comme ledit suppliant a entendu, estoit de notre ville de Douay et duquel il n’a congnoissance autrement que estoit houssé et avoit les couleurs de notre très chier et féal cousin le conte de Gaures seigneur de Fiennes, survint sur leur escot ung nommé Pierre RABY homme de guerre soubz la charge de notredit cousin le conte de Nassou notre premier chambellan. Et après que ledit bastard de Licques eust disné avecq les dessusdits mandèrent leur escot et incontinent ce fait, ledit Pierre RABY se départit sans payer sone scot. Parquoy Regnault FREMAULT serviteur de ladite taverne leur rapporta response qu’ilz avoient despendu pour l’escot desdits bastard de Licques et homme de Douay six solz huit deniers tournois, lequel homme de Douay offrit payer son escot. Ce oy par ledit bastard lui dit rigoureusement qu’il failloit qu’il paiast tout, en usant de hautaines parolles en disant : vilain tu payera tout l’escot. Et en ce disant donna ung soufflet audit homme de Douay en le prenant par le collet. Et encores non content de ce, tira son baston pour ce que ledit homme estoit surprins de vin comme il sambloit et par ce moien ne se povoit bonnement ayder, tellement qu’il le fist en ladite du Croissant d’Or où il lui donna pluiseurs cops de poing meismement ung cop d’estocq en son corps, pensant qu’il eust tué. Et ainsi que ledit homme de Douay sortist hors de ladite maison et passoit audevant l’huys d’icelle ung nommé Martin FREMIN aussi homme de guerre de la compaignie dudit conte de Faulquembergues, percevant l’outraige que s’efforchoit faire ledit bastard contre ledit homme de Douay et qu’il n’estoit homme de deffence à cause du vin dont il estoit surprins, desgaina son espée pour y mectre le bien entre deulx, disant audit bastard de Licques ces motz : monsieur le bastard que demandez vous à ce povre homme, il est bon à batre, je payeray demi lot où il vous plaira. En disant lesquelles parolles ledit homme de Douay retournoit vers ledit bastard se plainiant de luy. En quoy faisant ledit bastard se tira vers ledit homme de Douay et eulx estans sur ledit marchiet ruèrent pluiseurs cops d’espée les ungs sur les autres disant ledit homme de Douay : doulcement audit bastard , je ne vous demande riens. Néantmoins ruant encores pluiseurs cops sur ledit compaignon telleemnt qu’il fut navré en deux ou trois lieux tant ou corps comme en la teste, disant ledit compaignon audit bastard : vous m’avez tué, sur quoy il respondit : maistre paillart se je retourne je te batray bien. Après lesquelles parolles ainsi dictes ledit de Licques s’efforçoit encores oultragier ledit compaignon, ce voyant ledit Martin dit à pluiseurs assistens au dite affaire : messieurs laisserez vous tuer cest homme icy. Et incontinent par le moyen dudit Martin et autres gens de bien, ledit homme de Douay saulva en la maison de Franchois le barbier et fust defaicte la meslée d’eulx deux. Et s’en alla ledit bastard asseoir sur le bancq de ladite maison du Croissant d’Or que lors ayant rebouté son espée, lesdits Martin et suppliant, parcevant que ledit bastard estoit couroucé, s’approchèrent de luy et lui dirent : mon frère et mon compaignon allons nous en boire ung lot de vin et nous le payerons. Et voyant ledit Martin que ledit bastard ne voulu boire se départissent. Et tost après ledit Pierre RABY huyda hors de ladite taverne fort eschauffé et bien beu, ayant les bras à demi hors de son sayon, jurant disant : qui est qui en veult au bastard de Licques, auquel il dit : mon compaignon estes vous navré. A quoy ledit bastard respondit que non, mais il y a eu quelque vilain qui m’a empesché de user de ma voulunté et se je le trouvoye je m’en vengeroie. Et tost après ainsi que ledit Martin, lequel passoit sur ledit marchié sans plus penser au fait dessusdit, retournoit et approchèrent furieusement de luy lesdits bastard et RABY, lesquels et chacun d’eulx ayans leurs bastons tyrez, par ensemble s’efforchèrent oultraigier icelluy Martin. Et de fait ledit bastard rua pluiseurs fois après luy et lui en donna deux cops l’ung sur la teste et l’autre sur le costé dextre et fist cheoir son bonnet. Ce voyant ledit suppliant, lequel passoit son chemin sur le grant marchié sans paravant avoir quelque parolles aux dessusdits, remonstrans doulcement et à bonne intencion audit bastard son tort et lui disoit que le mouvoit de batre ledit povre homme, requerrant qu’ils se voulsissent départir et appaisir, actendu que ledit Martin y avoit mis le bien pour luy. Dont le bastard ne se contenta, mais au contraire usant de haulx termes desgaigna son espée disant en regardant ledit Martin : ce paillart cy m’a empeschié, l’autre me povoit bien tuer. Et de fait ledit bastard rua de sadite espée ung cop sur la teste dudit Martin dont il fut bleschié et si rua de sa dite espée sur les autres qui estoient auprès de luy. Et mesmement s’efforça vouloir oultragier ledit suppliant tousiours continuant de son baston d’estocq contre lui, pour le mectre à mort s’il eust peu. Ce voyans aucuns compaignons de guerre estans audit marchié s’approchèrent dudit bastard et firent tellement qu’il se retira en l’allée devant la maison du CONTENTIN où demeure Jehan HERLIN, où ung homme de guerre, duquel ledit suppliant n’a congnoissance, accoustré d’une cappe grise sayon pourpoint bonnet et chausses noires sievit premièrement ledit feu bastard lequel behourdoit de son estocq après ledit homme et quant audit suppliant il poursuyvit à tout son espée nue ledit bastard ayant aussy son espée jusques au devant de ladite allée en laquelle il receut ung cop d’estocq ou corps, duquel cop il termina incontinent vie par mort.

Et combien que ledit suppliant ne sache à la vérité qui donna ledit cop et qu’il soit amérement desplaisant de l’advenue dudit hommicide, néantmoins pour ce qu’il s’en alla incontinent vers la porte Saint Michiel de notre dite ville, et se absenta de la compaignie il doute que l’en lui vouldra imposer avoir comme ledit cas, ne se oseroit trouver en noz pays et seigneuries, ne retirer en sa garnison en notre service à son très grand regret dommaige et interrest se notre grace ne luy estoit impartie. (…)

Donné en notre ville de Dordrecht ou mois d’aoust l’an de grace mil cincq cens et vingt deux,et de nos règnes asavoir des Romains et de Hongrie le quatrième et des Espaignes etc le septiesme, ainsi soubzscript et signé par l’empereur en son conseil ; L. DEBLIOUL visa.