Jehan de RANSSART, d’Arras

(AD59, B1738, folio 5v)

En 1523 à Arras, Jehan de RANSSART blesse mortellement Anthoine PERNOIS qui ne pensait journellement qu’à brouiller son ménage.

Charles, etc, savoir faisons à tous présens et avenir, nous avoir receu l’umble supplicacion de Jehan de RANSSART, povre homme du mestier de corduannier ouvrant devant autruy, chargié de femme et enffans, résidans en notre ville d’Arras, contenant comme le jour de la feste de Nativité Notre Dame, ou mois de septembre l’an XV^C et XXIII, ledit suppliant estant du guet de ladite ville comme sont les autres mesnagiers, et en soy retournant en sa maison, environ sept heures du soir, trouva ung nommé Guillamme LE MERCIER avecq lequel il se devisa de pluisseurs affaires. Que lors survynt ung nommé Anthoine PERNOIS aussi courduannier, à présent defffunct, qui lors résidoit prez de la maison dudit supliant, et lequel deffunct estoit homme noysif et quereleux. Mesmes pour haynne qu’il avoit concheu contre ledit supliant, mettoit journellement peine à faire dissension et noise en mariage d’entre ledit supliant et sa femme, à l’occasion de quoy ledit supliant et sadite femme ne povoient vivre en paix.l’ung avecq l’autre, se seroit ledi jour et à ladite heure approuchié et garny d’une espée à son cousté. En le coustoyant jasoit ce que ledit supliant ne parlast à luy ne en aucune manière, et en disant par ledit feu ces motz : à qui en veuz tu, alla mettre la main à sadite espée. Quoy voyant ledit supliant thira son cousteau pour mettre audevant dudit feu, craindant par luy estre oultragié de sadite espée, parce que ledit supliant n’avoit autre baston que sondit cousteau, et soy voyant ainsy aggressé par ledit PERNOIS, de remort soudain, chaulde cole et premier mouvement, frappa ung seul cop de sondit cousteau sur l’espaule dudit PERNOIS. Et ce fait incontinent se retira sans plus avant frapper ledit feu, duquel cop ledit feu environ dix ou douze jours aprez seroit allé de vie à trespas, par faulte de soy faire sur ce curer et médiciner, attendu que ledit cop n’estoit mortel s’il y eust prins garde. Que ce venu à la congnoissance dudit supliant, pour révérence de justice s’est absenté de noz pays et seigneuries, et n’y oseroit bonnement converser avecq sesdits femme et enffans, auquelz par ce moyen convient mendier leurs vyes.

Combien qu’il ait fait paix et satisfaction à partye intéressée et que en autre chose il soit tousiours esté bien famé et renommé sans jamais esté noté ne convaincu d’aucun autre villain cas ou reprouche, se notre grace et miséricorde ne luy estoit sur ce impartye, si comme il dit très humblement requérant icelle. Pour ce est il que, nous ces choses considérées audit Jehan de RANSSART supliant, inclinans favorablement à sadite supplicacion et requeste, et luy veullans en ceste partie, préférer grace et miséricorde à rigueur de justice, avons ou cas dessusdit, quictté remis et pardonné, quittons remettons et pardonnons (…).

Donné en notre ville de Malines ou mois de janvier l’an de grace mil cincq cens et vingt quatre (…).