Jehennet PRONNIER, de Roclincourt

(AD59, B1737, folio 14)

En 1525 à Neuville-Saint-Vaast au sortir d’un cabaret, Jehennet PRONIER et un soldat importunent deux jeunes filles qu’ils croyaient être filles de joie. Le suppliant est emprisonné pour ce délit.

Charles etc, savoir faisons à tous présens et avenir, nous avoir receu l’humble suplicacion de Jehannet PRONNIER, josne filz à marier éaigié de vingt ans ou environ, natif du villaige de Roclencourt en notre conté d’Artois, contenant comme le X^e jour d’aoust dernier passé, en cest an XV^C XXV, jour de la déducasse de Noeufville Saint Vaast, ainsy que luy suppliant estoit au cabaret oudit lieu, entrèrent illec deux josnes filles dont l’une d’icelles, à la requeste d’ung josne compaignon parent de l’hostesse dudit cabaret, dansa une danse. Ce que regarda ledit suppliant qui lors estoit accompaigné d’ung homme de guerre nommé Sire MARTIN, par lequel il fust induit de regarder quelle part lesdites filles yroient, entendans, tant par ce qu’elles avoient dansé ladite danse oudit cabaret qui est lieu assez suspect comme aussi de leur contenance et habitz légiers et lubriques, que ce fussent filles de joye et de fait les suyvirent jusques aux champs tirant dudit villaige vers notre ville d’Arras. Et en approchant d’icelles dirent aulcunes parolles telles qu’ilz feroient les nopces avec elles, ce qu’elles ne volurent consentir. Et néantmoins pensans que ce fussent fictions et simulations les prindrent par les bras, continuant en leur premier propos auxquelles ne volurent condescendre. A ceste cause, veans leur parsévérance prindrent aucunes tartes qu’elles portoient en les délaissant aller leur chemin vers ladite ville, et se retirèrent audit cabaret dont ils estoient partiz. Et néantmoins auroit esté ledit suppliant depuis averti qu’ilz avoient esté deceuz d’icelles filles, et qu’elles estoient de vie honneste. Par raison duquel caz ledit supliant, craindant rigeur de justice, se absenta certain espace de temps dudit lieu de Noville et autres noz pays. Et après pensant l’advenue dudit caz estre mis en oubly, se trouva en notredite ville d’Arras pour exercer son mestier où il fut, pour ledit cas, par les seschevins d’icelle ville, constitué prisonnier ès prisons de la chastellenie illec où il est encoires à présent en grant povreté et misère, et doubte que on vouldra à ceste cause contre luy procéder rigoreusement, ou autrement, criminellement se que si ainsi advenoit luy tourneroit à sa totale destruction, scandale et déshonneur de ses parens et amis, ne soit moyennant notre grace de laquelle attendu ce que dit est, meisment qu’il est bien famé et renommé sans avoir commis autre caz (…).

Donné en notre ville d’Anvers ou mois de février l’an de grace mil cincq cens vingt et cincq, et de noz règnezs assavoir des Rommains et Germanie le VIII^e et de Castille le X^e ; par l’empereur en son conseil ; DUBLIOUL visa.

[estre deceuz= être dans l’erreur, être trompé]