Jehan LE PREVOST, à Arras

(AD59, B1734, folio 14)

En 1522 dans un cabaret tenu par Jehan LE PREVOST à Arras, François ELLART traite de son mariage. Surviennent Florentin BAUDUIN et autres à qui François propose de régler leur écot, à condition de le rembourser le jour de son mariage. Une querelle survient alors et après diverses péripéties Jehan LE PREVOST tue Florentin BAUDUIN d’un coup de hallebarde.

Charles etc, savoir faisons à tous présens et avenir, nous avoir receu l’umble supplicacion de Jehan LE PREVOST, marchant de bois demourant en notre ville d’Arras et chargié de femme et quatre enfans, contenant comme le second jour de ce présent mois de mars, Jehan de VILLERS dit Buteur, François ELLARD, Robert de LIBERSART sa femme et autres gens de bien, vindrent souper en la maison dudit suppliant pour intencion de traittier mariage dudit François ELLARD avec lequelz ledit supliant et sa femme furent pryez. Et ainsi qu’ilz commenchoient à souper, y survindrent ung nommé Florentin BAUDUIN dit Tin et Yop DALURÉ, josnes compaignons à marier, lesquelz avoient bien beut. Et aprez que le soupper estoit prez finy et avant que l’escot fut payé, ledit François ELLARD mist en avant par manière de devise qu’il presteroit ledit escot ausdits Florentin et Yop et à ung nommé Jennet DU BOIS aussi compaignon à marier, à lui rendre ledit escot par les dessusdits lorsqu’il prendroit en estat de mariage. A quoy ilz se condescendirent, mais quant ce vint à faire cédulle dudit prest, ledit Florentin en détestant le nom de Dieu dit qu’il n’avoit esté question de gaignier tout ledit escot montant en tout à cent solz tournois, mais seulement la moitié disant qu’il n’en feroit riens. Tellement que ledit François ELART ce veant demanda son bonnet que icellui Florentin avoit affulé sur sa teste. Mais ledit Florentin, par desfit et dédain , rua ledit bonnet au feu et desgaigna incontinent son espée, à tout laquelle il rua après ledit François lequel estoit empesché de retirer sondit bonnet hors du feu. Tellement qu’il fut contraint widier et se départir de la chambre comme aussi fist ledit Jehan de VILLERS. Et en cest instant, fut l’huys de ladite chambre clos et fermé pour doubte que ne fussent suys dudit Florentin. Lequel voiant qu’il ne povoit mettre à exécucion son maulvais couraige contre ledit François, se adressa audit Robert de LIBESART son oncle et estant garny d’un estocq en l’un de ses mains et d’un cousteau en l’autre et jurant et blasphémant la chair de Notre Seigneur, luy dit ces mots ou semblables : tu le soustiens je te tueray. Et lors icellui supliant se voyant et oyant et pour doubte que ledit Florentin ne oultragast ledit Robert qui est homme impotent et débile lui dit ces motz : quel effroy est ce cy, veult tu tuer ton oncle. Nonobstant quoy ledit Florentin continua en son mauvaiz propos etdudit estocq qu’il avoit lancha par diverses foiz après ledit Robert, tellement que icellui suppliant contendant de garandir ledit Robert, print ung tison au feu. Et alors ledit Job DALURÉ illec présent auquel l’on ne parloit et touchoit ledit débat dit audit supliant que s’il s’en vouloit mesler ou parler, que c’estoit à lui qu’il en vouloit. Et de fait soy joindant avec ledit Florentin, lança de son espée toute nue après ledit suppliant comme faisoit aussi ledit Florentin et n’eust esté la femme dudit suppliant et celle dudit LABESART lesdits Florentin et Job l’euissent tué ou grandement oultragé. Et nonobstant qu’il estoit en sa maison fut contraint pour eschever inconvénient wider hors de ladite chambre. En partant de laquelle il fut poursuy par lesdits Job et Florentin aiant leurs espées nues jusques en la court d’icelle maison et auprez d’une montée bien estroite par laquelle on va en une petite chambre de derrière où gisoit lors malade ung homme de guerre nommé REGNART de la charge et compaignie de notre gouverneur d’Arras. En laquelle chambre icellui supliant se retira hastivement pour soy sauver et en l’entrée d’icelle chambre trouva la hallebarde dudit RENART, laquelle il print pour soy deffendre et garandir contre les aggressions que faisoient contre lui lesdits Florentin et Job, lesquelz le poursuyoient tousiours de leurs espées après lui. A laquelle cause, icellui suppliant, en deffendant ladite entrée au mieulx qu’il povoit et garandi de ladite hallebarde, attaindit ledit Job au costé destre. Après lequel cop icellui Job et ledit Florentin avec luy se départirent incontinent de là. Et environ dix huit jours après ledit Job par faulte d’appareil ou autrement, termina dudit cop vie par trespas.

Donné en notre ville de Malines ou mois de mars l’an de grace mil cincq cens vingt et deux et de noz règnes assavoir de cely des Romains et Hongrie le quatriesme et des Espaignes et autres le huitiesme ; ainsi signé par l’empereur en son conseil ; VERDE RUE.

[eschever inconvénient = échapper à une situation délicate]