Piérotin PIERON, de Villers-au-Bois

(AD59, B1734, folio 38)

En 1515 à Angres, Piérotin PIERON tue Légier BARTELOT d’un coup de fourche ou de grauet sur la tête, après avoir eu des mots avec ce dernier, certainement pour des raisons futiles.

Charles etc, savoir faisons à tous présens et avenir, nous avoir receu l’umble supplication de Piérotin PIERON dit le Brède, povre josne filz à marier sans père et mère chargié de pluiseurs enffans ses frères et sœurs, demourant au villaige de Villers au Bois en ntre pays et conté d’Artois, contenant comme le lundi après le My Quaresme de l’an mil V^C et quinze, icellui suppliant, lors demourant en la maison de Jehan MERCADÉ laboureur demourant à Angre, comme varlet menant les chevaux dudit MERCADÉ, se seroit party environ le soir après le souper de la maison de sondit maistre pour aller jouer ès rues. Et lors oyt que en une maison assez près de la maison de sondit maistre, y avoit grant bruyt et esbatement et alla vers ladite maison pour soy esbatre et trouva en la court d’icelle ung nommé Légier BARTELOT à présent deffunct, lequel estoit desguisé en contrefaisant la chèvre, auquel icellui demanda qui menoit si grand bruyt en ladite maison. A quoy ledit feu respondit que c’estoit lui et aultres estans en ladite maison avecq aulcunes josnes filles. Ce dit rentra ledit BARTHELOT dedens ladite maison et le suyvit ledit suppliant. Et tost après prindrent icellui deffunct et suppliant parolles ensemble tellement que ledit deffunct le voulut frapper d’un baston qu’il tenoit en sa main. Au moyen de quoy ledit suppliant wida d’icelle maison et s’en alla en la maison de sondit maistre, où il trouva Bonnet MERCADÉ filz dudit Jehan son maistre qui estoit en l’estable des chevaux, auquel ledit suppliant dit : allons veoir les esbatemens que font Légier BARTELOT et aultres qui sont en une maison cy après. A quoy ledit Bonnet se consentit et prindrent chacun ung baston en leurs mains, assavoir le suppliant une fourcque et ledit Bonnet ung hot ou grauet sacque fien, se partirent et allèrent veoir lesdits Légier et compaignons qui estoient en ladite maison, non pensant à mal ny aux parolles qu’il avoit eu audit deffunct, rencontrèrent ledit Légier BARTELO qui estoit encoires desguisé. Et estoient avec lui ung ou deux compaignons assez près de la maison de ung nommé LE PESQUEUR, lequel deffunct dit aucunes parolles arrogantes audit suppliant. Non content de ce, icellui suppliant et Bonnet commenchèrent à ruer après ledit deffunct et lui pareillement après eulx d’un baston qu’il tenoit en sa main. Tellement que icellui Légier eut pluiseurs cops que lui donnèrent ledit suppliant et Bonnet de leursdits bastons, assavoir de ladite forcque et grauet et en eulx garandisssant contre ledit deffunct qui lanchoit touisours dudit baston après eulx, ce voyant ledit suppliant, de chaudecolle et non pensant ainsi le frapper, lui donna ung cop sur la teste duquel cop ledit Légier BARTELOT cheut par terre. Au moyen desquelz cops, par faulte de bon appareil, gouvernement ou autrement, il seroit trois sepmaines après terminé vie par mort.

Et combien que ledit suppliant soit très dolent et sincérement repentant de l’advenue dudit cas et que depuis il s’est bien et honnestement conduit, néantmoins icellui suppliant est à présent pour ledit cas détenu prisonnier ès mains de notre prévost des mareschaulx en notre ville d’Arras et doubte que pour icellui cas l’on ne vueille mectre au dernier supplice à son très grand regret et à la désolation de sesdits povres frères et sœurs, se notre grace et miséricorde ne lui est sur ce impartie, si comme il dit pour laquelle actendu ce que dit est, il nous a très humblement supplié et requis. Pour ce est il que nous, ces choses considérées, à icellui Piérotin PIERON suppliant, avons ouquel cas dessusdit en lui préférant grace et miséricorde à rigeur de justice, quitté remis et pardonné, quictons remettons et pardonnons de notre grace espécial par ces présentes, le cas et homicide dessus déclairé, cironstances et deppendences ensemble toute paine amende et offence corporelle et criminelle en quoy il puet à la cause ditte avoir offencé et mesprins envers nous et justice. Et l’avons quant à ce, restitué et restituons à ses bon nom fame et renommée et à ses biens non confisquez s’aucuns en a, comme il estoit auparavant l’advenue dudit cas, en imposant sur ce, sillence perpétuel à notre procureur général et à tous noz aultres justiciers et officiers quelzconques, satisfaction toutesvoyes faite à partie intéressée, premièrement et avant toute euvre se faite n’est et elle y chiet civillement tant seullement pourveu que ledit suppliant sera tenu l’amender envers nous aussi civillement selon l’exigence du cas et la faculté de ses biens et aussi payer et refondre les mises raisonnables de justice s’aucunes en ont esté faites à la cause ditte, à l’arbitraige et tauxacion de notre gouverneur d’Arras ou son lieutenant que commettons à ce. Si donnons en mandemant à notredit gouverneur ou sondit lieutenant que appellez ceulx qui pour ce seront à appeler, ilz procèdent bien et deuement à la vérifficacion et intérinement de cesdites présentes et à l’arbitraige et tauxation de laditte amende civille et despens dessusdits. Et ce fait et ladite amende civille tauxée arbitrée et payée ès mains de noz receveurs qu’il appartiendra, lequel en sera tenu faire recepte et rendre compte et reliqua à notre proufit avec les aultres deniers de sa recepte, il et tous aultres noz justiciers et officiers cui ce peut et pourra toucher et regarder leurs lieuxtenans et chacun d’eulx endroit soy et si comme à lui appertiendra facent seuffrent et laissent ledit Piérotin PIERON suppliant de notre présente grace, quictance rémission, pardon et de tout le contenu en ces dites présentes, selon et par la manière que dit est, plainement paisiblement et perpétuellement joyr et user sans lui faire mettre ou donner ne soufrir estre fait mis ou donné aucun destourbier ou empeschement au contraire, en corps ne en bien en manière quelconque, ains se son corps ou aulcuns de ses biens non confisquez sont ou estoient cy après pour ce prins saisiz ou empeschez, les mettent ou facent mettre incontinent et sans délay à plaine et entière délivrance, car ainsi nous plaist il. Et ffin que ce soit chose ferme et estable à tousiours, nous avons fait mettre notre seel à ces présentes, saulf en aultres choses notre droit et l’aultruy en toutes.

Donné en notre ville de Malines le jour du Vendredi Saint l’an de grace mil cincq cens vingt et deux et de noz règnes assavoir de cely des Romains et de Hongrie le IIII^e et des Espaignes le VII^e ; signé DARDENNE.

[ung hot = une houe ; un grauet sacque fien= un croc pour tirer le fumier ; destourbier = trouble, empêchement]