Philippes CARPENTIER, de Beaufort

(AD59, B1736, folio 103)

En 1524, Près de Noyelle-Vion, plusieurs compagnons de guerre quitent un cabaret après y avoir beaucoup consommé. L’un d’eux, Philippes GOURDIN s’allonge près d’une haie et s’y endort. Un de ses compères, Pierre DU PENIN le réveille brutalement, mais Philippes GOURDIN se fâche et sort son épée avec laquelle il menace Pierre DU PENIN et le suppliant Philippes CARPENTIER. Un nommé Anthoine QUI NE JURE tue ensuite ledit GOURDIN d’un coup d’épée au cœur et en blesse un autre.

Charles, etc, savoir faisons à tous présens et avenir, nous avoir receu l’umble supplicacion de Philippes CARPENTIER, labourier nagaires demourant au villaige de Beauffort prochain et contigu à la frontière de France, contenant que ou mois de may l’an XV^C XXIIII par certain jour de samedi, ledict supliant, Pierre de PENIN, Jehan PIERON, Anthoine QUI NE JURE et autres dudict Beauffort, et du pays à l’environ ou nombre de dix, entre lesquelz estoit à présent deffunct Philippes GOURDIN, se partirent dudict villaige de Beaufort où ilz se réfugioient comme en lieu fort, pour doubte des ennemis, pou eulx venir récréer au villaige de Noyelle Wyon, distant dudict lieu de une petite lieue ou environ. Et estans sur le chemin, ruèrent la boulle trois contre trois et eulx arrivez audict Noyelle, allèrent disner ensemble au cabaret de Mathieu LE ROUX, où ilz furent jusques environ trois heures après midy, sans que entre eulx y olt quelque débat, ne apparence d’en y avoir. Auquel escot lesdicts GOURDIN et Anthoine QUI NE JURE furent entrebeuz ou aucunement surprins de boire. Et après disner, se partirent dudict cabaret et s’en allèrent devant leszdicts Philippes GOURDIN, Anthoine QUI NE JURE, ung josne filz nommé Flourens ASSELLIN et autres, tellement que ledict defunct Philippes GOURDIN se coucha derrière une haye estant à l’issue dudict villaige de Noyelles, attendans ledict supliant, Pierre DU PENIN dit Pelot et autres qui estoient derrière lequelz les sievyrent tost après. Et veant ledict Pelot que ledict feu GOURDIN ainsi couchié dormoit, contendant le resveillier et faire lever desgaigna son estocq duquel il frappa pluiseurs cops du cop sur les jambes et sur le corps dudict feu tellement qu’il le resveilla. Et sitost qu’il fut resveillié se leva en disant ces motz : allement, allement, et après qu’il olt ce dit, desgaigna sa rapière contre ledict de PENIN. Que lors ledict supliant, veant et entendant que ce fust ici à cause qu’ilz crioient l’un après l’autre : haire, haire, comme ont de coustume faire compaignons de guerre, se approcha de eulx desgaignant aussi son baston. Que lors ledict feu GOURDIN, soy adreschant audict suppliant lancha pluiseurs foiz de son baston après luy, comme feist pareillement icellui suppliant, après ledict feu, du sien, contendant soy garandir des aggressions que lui faisoit icellui feu Philippes GOURDIN, et ruèrent pluiseurs cops l’un sur l’autre. Mais icellui feu le poursievoit si radement qu’il le contraindit de reculer contendant le oultragier. Parquoy ledict supliant, se voyant et pour doubte que ledict feu ne le tuast, requist ayde audict Anthoine QUI NE JURE disant : compère, me laissera tu ici tuer. Enssuyant laquelle requeste, ledict Anthoine se aprocha dudict feu GOURDIN et d’un estocq qu’il avoit, rua pluiseurs cops après icellui feu, et de l’un d’iceulx le attaindit tout droit au cuer, duquel cop il tomba par terre et incontinent aprè morut sur le place. Auquel conflict ledict feu GOURDIN appela aussi en son ayde Jehan PIERON son cousin, lequel il vint à tout son espée nue, et fut navré tant par ledict supliant que dudict Anthoine QUI NE JURE, à sang courant et playe ouverte, ou bras et au corps à l’endroit de la mamelle, desquelles bleschures il a depuis esté savé et gary.

Et jasoit que, ledict supliant n’ait donné le cop dont ladicte mort s’est ensievye, et qu’il en ait désia fait satisfaction aux parties intéressées, néantmoins pour doubte et révérence de justice, il n’oseroit hanter ne converser en noz pays et seigneuries, ains l’en conviendra tenir absent et vivre ailleurs en grant povreté et misère, n’est ne notre grace et miséricorde lui soit sur ce impartie, pour laquelle il nous a très humblement supplié et requis. (…)

Donné en notre ville de Bruxelles ou mois de novembre l’an de grace mil cincq cens vingt et cinq, et de nos règnes assavoir, de celluy des Romains et Germanie le VIII^e et de Castille le IX^e ; par l’empereur en son conseil ; signé Verderue.

[radement = rapidement, violemment ; haire, haire = au secours ! ; allement/aliement = alliance, lien ; donc allement, allement = à l’aide !]