Pierotin PHILIPPES, à Thélus

(AD59, B1742, folio 113v)

En 1527 à Thélus, Pierotin PHILIPPES et Fremin HUGOT ayant bien bu déambulent dans les rues. ils rencontrent Adrien GAILLART et Colin LALAING qu’ils ne connaissent pas et pour ce seul motif dégainent leurs épées et les attaquent. Collin LALAING est blessé mortellement.

Charles, etc, savoir faisons à tous présens et advenir, nous avoir receu l’umble supplicacion de Pierotin PHILIPPES, josne filz à marier, nagaires résident à Tellus en notre pays d’Artois, contenant comme le jour Saint Estienne de l’an XV^C XXVII, icelluy suppliant et Fremin HUGOT aussi josne filz, allèrent joer par ung villaige dessusdit Thellu envieron sept ou huit heures du soir, pour eulx récréer et desviser avec aucunes josnes filles en tout bien tout honneur. Et ainsi que passèrent devers ung jardin appartenant à Jaques LE ROUX audict Tellus, veient deulx autres compaignons illecq estans, qu’ilz ne recogneurent lors, mais ont depuis ouy dire que c’estoient ung nommé Adrien GAILLART pigneur de looynes et Collin LALAING à présent deffunct, demourans audict Tellus. Et combien que comme dessus est dict n’eussent aucune volunté de mal faire, néantmoins pour ce qu’il estoit tard, faisoit brung, et avoient ledict suppliant et son compaignon bien beu, desgaignèrent leurs espez et ruèrent, assavoir ledict suppliant aucuns cops du plat de son espée sur ledict Adrien, dont il ne fut point blesché, et ledict HUGOT rua aucuns cops sur ledict deffunct Collin de LALAIN, dont il ne fut aussi blesché à sang courant, mais fut aucunnement froissié en l’ung de ses bras. Et le lendemain, comme ledict supliant a oy dire, alla ledict deffunct jouer et crochier avec aucuns compaignons dudict Thellus, sans soy complaindre desdicts cops à luy donnez, ne en faire aucune mémoire. Toutesfois icelluy deffunct aucuns jours après, et faute de soy estre fait panser, mauvaise garde ou autrement seroit allé de vie à trespas. (…)

Donné en notre ville de Bruxelles ou mois de septembre l’an de grace mil cincq cens trente et ung, de notre empire le second, et de noz règnes des Espaingnes des Deux Sécilles etc le XVI^e ; escript sur la réplicque par l’empereur en son conseil ; signé Verderue.

[froisser = briser, meurtrir ; pigneur de loyne = peigneur de laine]