Huchon MOULLART, à Arras

(AD59, B1739, folio 70)

En 1525 à Arras, Huchon MOULLART après une course en France, Huchon MOULLART mange en une taverne et déclare qu’il paiera l’escot avec le butin de la course que lui promet le seigneur de Warluzel. Mangeant encore en ladite taverne avec le nommé Piere DAMIENS butinier, il demande à celui ci de payer le présent repas et de rembourser le premier. Ce qui est refusé par ledit DAMIENS. S’ensuit une dispute au cours de laquelle Huchon MOULLART blesse mortellement Piere DAMIENS de deux coups de couteau.

Charles etc, savoir faisons à tous, présens et avenir, nous avoir receu l’umble supplication de Huchon MOULLART, homme d’armes de noz ordonnances soubz la charge et conduite du conte de Brières notre cousin et capitaine général, contenant comme sous deux ans ou plus, après que ledit supliant avoit fait certaine course en France avec le seigneur de Warlusel et pluisieurs autres gens de guerre de notre parti, où lors ilz surprindrent le chasteau de Sorel et le seigneur d’icelluy estans dedans avecq pluisieurs François et qu’ilz estoient retirez avecq leurs prisonniers et butin en notre ville d’Arras. Icelluy seigneur de Warlusel et pluisieurs autres gentilzhommes avec lesquelz icelluy supliant fut appellé se conclure aller disner en une taverne nommée La Fleur de Lyz d’Or en notredite ville d’Arras, en laquelle pour ledit disner, fut par eulx despendu la somme de onze florins ou environ. Laquelle somme par la charge ordonnance dudit seigneur Warlusel, chief de ladite emprinse et course, il supliant soustient et promest paier à l’ostesse de la dite taverne soubz espoir et promesse que ledit seigneur de Warlusel luy fist qu’il l’en feroit récompenser des deniers dudit butin et enssyut quoy et pour seureté dudit escot ledit remonstrant bailla son signet d’or en gaige à ladite hostesse. Or est que depuis ledit escot soustenu et mesmes ledit jour où tost aprez ledit supliant et aucuns compaignons de ladite course entre lesquelz estoient deffunct lors vivant Piere DAMIENS se retrouvèrent sur ung soupper en ladite taverne, où ils despendirent la somme de cincq florins ou environ et pour icelle gaigner furent entre eulx faite pluiseurs divises. Quoy oyant ledit suppliant dit que ledit feu Piere DAMIENS estoit butinier et avoit le maniement des deniers et partant pouvoit bien payer d’iceulx deniers ledit soupper avecq aussi ladite somme de onze florins qu’il avoit soustenu par la charge dudit seigneur de Warluzel. Sur lequel propos ledit feu Piere DAMIENS qui estoit homme félon et haultain respondit audit supliant qu’il n’en feroit riens et que bien luy convient illecq laisser sondit signet, l’appellant villain, impropérant pluiseurs villainnes et outragieuses parolles et disant que si l’on voulloit croire lesdits seigneur de Warluzel et suppliant, qu’il n’y auroit deniers assez pour satisfaire à leurs boitures. A l’occasion desquelles parolles se meust lors noise entre lesdit supliant et feu Piere DAMIENS. Tellement que icelluy supliant d’ung cousteau qu’il tenoit en sa main pour soy garantir et craindant qu’icelluy deffunct qui estoit homme assez dangereulx ne luy fist desplaisir, en donna par meschief deux petits cops environ la teste. Au moien desquelz icelluy feu, par faulte de bon appareil et qu’il ne s’est gardé et fait penser, mais a, depuis avoir eu lesdits cops, hanté les tavernes, il seroit trois sepmaines aprez ou environ allé de vie à trespas. (…)

Donné en notre ville de Malines le jour du Vendrdi Saint ou mois d’avril l’an mil V^C XXVII et de noz règnes etc ; soubzsigné par l’empereur en son conseil ; signé VERDE RUE.