Simon MERLE, à Arras

(AD59, B1734, folio 6v)

En 1523, dans un cabaret à Arras, Michiel de ROEUVILLE prétend que Simon MERLE a une dette envers lui. Ce dernier répond ironiquement qu’il le remboursera s’il lui montre une preuve écrite de cette dette. Une bagarre en résulte au cours de laquelle le premier est tué par le second d’un coup de poignard en la poitrine.

Charles, etc, savoir faisons à tous présens et avenir, nous avoir receu l’humble supplicacion de Simon MERLE, josne homme, contenant que le dimence premier jour de ce présent mois de mars au soir, environ huit heures, se transporta en ung cabaret nommé le Repos en notre ville d’Arras, à intencion de y boire comme font pluiseurs personnes. Auquel lieu ainsi qu’il buvoit et se récréoit avec aucuns de ses compaignons, entre lesquelz estoit ung nommé feu Michiel de ROEUVILLE, lequel combien que ledit suppliant ne lui deist ou feist mal ou iniures, par grant égreur et de felon coraige, lui demanda s’il ne le payeroit point, à quoy en toute doulceur et gracieuseté ledit supliant respondit en demandant quelle chose il lui devoit, déclarant qu’il lui monstrast la cédulle du deu et qu’il le payeroit très voulentiers. Oy laquelle responce ledit feu incontinent saillit de la table où ilz estoient assis, garny de son espée disant audit supliant qu’il y laisseroit le chappron qu’il portoit. Quoy voiant ledit supliant, cuidant tousiours par belles parolles appaiser l’ire et fureur dudit feu, lui offroit namptir ung escu d’or ou cas qu’il voulsist aller quérir ladite cédulle, dont ledit feu ne se contenta. Ains en persévérant en son mauvais propos dit audit supliant qu’il n’estoit que ung dansseur, que l’on le congnoissoit bien, qu’il y avoit en lui pluiseurs braghes et nestoit que filz d’un merchier et que s’il le tenoit ès rues, lui feroit mengier son pongnart. En quoy disant, ledit feu se mist en paine d’oultrager ledit supliant, lancha après lui pluiseurs cops de sadite espée en jurant et blasphémant le nom de Dieu et autres juremens excécrables, tellement que ledit suppliant pour cuiter le péril et dangier ouquel il estoit, lancha aprez ledit feu et l’attaindit en la poitrine d’un pongnart qu’il tenoit en sa main. Duquel cop ledit feu tantost aprez, il termina vie par mort. (…)

Donné en notre vile de Malines ou mois de mars l’an de grace mil cincq cens vingt et deux et de noz règnzes asavoir de celluy des Romains et Hongrie le quatriesme et des Espaignes et autres le septiesme ; ainsi dsigné par l’empereur en son coseil ; L. DUBLIOUL.

[cédulle = billet, reconnaissance de dette ; chaperon = chapeau ; namptir = donner un gage en garantie de dette ; brague, braghe = pantalon ; merchier = petit marchand, colporteur ; cuiter = considérer ; pongnart = poignard]