Bertrand de MERBAIS, à Arras

(AD59, B1734, folio 15bis)

En 1523 à Arras, Jehan DUFAY envoir Phelippes DARTOIS réclamer à des compaignons étrangers des deniers qui lui sont dus. Bertrand de MEURBAIS rencontrant Phelippes et Jehan déclare au nom du gouverneur qu’il faut lui remettre ces deniers. Jehan déclare que lui reprendre ces deniers, c’est le voler. S’ensuit une bagarrre au cours de laquelle un serviteur de Bertrand blesse mortellement ledit Jehan.

Charles etc, savoir faisons à tous présens et avenir, nous avoir receu l’umble suplicacion de Bertrand de MERBAIS, escuier capi taine de certain nombre de piétons, en notre ville et cité d’Arras, contenant comme environ le mois d’octobre dernier passé, Jehan DAUFAY, cépier des prisons des chanoines de Notre Dame d’Arras, auroit requis ung nommé Phelippe DARTOIS sergant desdits chanoines et chappitre, faire arrest sur les gaiges d’aucuns compaignons forains pour certaine somme de deniers que ledit DAUFAY maintenoit lui estre deue par ung prisonnier de guerre lequel seroit terminé vie par mort en ses prisons, tenant parti à nous contraire, natif des pays de deçà, ce que ledit sergent fist. Et icellui arrest ainsi fait, ledit supliant en passant par devant l’huys dudit Phelippe DARTOIS l’appella et lui dit : j’ay charge de monseigneur le gouverneur de faire rendre aux compaignons forains les deniers qu’avez arresté. A quoy respondit ledit Phelippes : je vouldroie bien que ledit DAUFAY y fut appellé par ce qu’il lui avoit dit que s’il rendoit l’argent qu’il s’en prendroit audit Phelippe et non à autre. Durant lequel temps que ledit supliant devisoit avec ledit sergant, ledit DU FAY s’est venu joindre avec eulx. Et lui là arrivé, ledit supliant dit audit DUFAY : monseigneur le gouverneur a ordonné à Phelippes DARTOIS rendre l’argent nampti en ses mains. De quoy ledit DUFAY respondit bien fièrement : il n’est point en vous ne en monseigneur le gouverneur le faire rendre et se vous le faites rendre, d’adressant audit supliant, vous me desrobez. Et de rechief dit audit Phelippes DARTOIS : se vous les rendez je m’en prendray à vous et m’en rendrez compte et reliqua. Ledit supliant oyant ces motz : vous me desrobez, se leva et marcha trois ou quatre pas vers ledit DUFAY sans aucunement le touchier. Et incontinent ledit DUFAY print ledit supliant par la teste et lui fist tomber son bonnet et n’eust esté par aucuns compaignons de guerre qui estoient présens et qui les séparèrent, ledit DUFAY eust grandement oultraigé ledit supliant. Après laquelle séparacion ainsi faite, lesdits compaignons remonstrèrent audit DUFAY le grant tort qu’il avoit d’avoir oultraigé ainsi leur cappitaine, lui conseillant qu’il se retirast, ce qu’il n’a voulu faire, mais demouroit tousiours disant mal et arguant contre ledit suppliant. Et ce voyant ledit supliant que ledit DUFAY ne vouloit partir, print le baston du prevost des mareschaulx de la garnison et le rua après ledit DUFAY. Pendant laquelle noise et débat ung des serviteurs dudit supliant vint à tout ung cousteau nu en sa main et en frappa ung cop par derrière en la fesse dudit DUFAY, dont ledit suppliant fut fort marry disant à son serviteur : vous avez tort d’avoir fait ce que vous avez fait. Duquel cop, environ quinze jours après, ledit DUFAY est terminé vie par mort. (…)

Donné en notre vile de Malines ou mois d’avril l’an de grace mil cincq cens vingt et trois après Pasques et de noz règnes assavoir de cely des Romains le IIII^e et des Espaignes le VIII^e ; par l’empereur en son conseil ; DESPLEGHEM visa.

[cépier = geôlier]