Gilles et Jehan de LHOMMEL, de Givenchy en Gohelle

(AD59, B1738, folio 79)

En 1523 à Givenchy, les frères Gilles et Jehan de LHOMMEL tuent à coups d’épée les frères Merin et Martin DESCENDRES qui avaient battu leur père, car il avait refusé de leur payer un repas pris en commun.

Charles etc, savoir faisons à tous présens et avenir, nous avoir receu l’umble supplication de Gilles et Jehan de LHOMMEL frères, josnes compaignons à marier, enffans de Martin de LHOMMEL, résident au villaige de Givenchy en la Gehelle, contenant que environ la fin du mois de may l’an XV^C XXIII, ledit Martin de LHOMMEL père desdits suplians, Merin et Martin DESCHENDRES frères et autres disnèrent ensemble en la maison de Clément VISEUX carbartier demourant audit lieu de Givenchy. Et après qu’ilz eurent disné et prins leur réfection, comptèrent leur escot qui montoit environ de IX à X patars, que ledit Merin DESCENDRES dit audit Martin de LHOMMEL qu’il lui prestast ledit escot. Ce que ledit Martin ne voulut faire, disant qu’il aymoit mieulx à payer un patar s’il l’avoit despendu que dix patars. A cause de quoy se meurent parolles, tellement que ledit Martin de LHOMMEL wyda la dite maison et affin qu’il n’y eust noise, ledit Clément hoste dudit cabaret ferma l’huys. Mais ledit Merin DESCENDRES voulant faire desplaisir audit Martin de LHOMMEL luy dit qu’il ouvrist l’huys ou qu’ils frapperoient sur luy, mais nonobstant lesdites menasches, ledit Clément VISEUX n’en voulut riens faire. Par quoy ledit Merin rompit et bouta oultre ung aultre huys, par lequel il wyda ayant ung thinel, comme aussi fist ledit Martin DESCENDRES son frère, garny d’un ferment, et coururent après ledit Martin de LHOMMEL qui s’enfuyoit et finallement le rataindèrent et frappèrent sur luy assavoir, ledit Merin dudit thinel en la teste, tellement qu’il l’abatist par terre, et incontinent qu’il fut tombé, ledit Martin DESCENDRES le frappa dudit ferment au dos. Et n’eut esté qu’aucuns y sourvindrent ilz l’eussent illecq homicidé, comme il fait à présupposer. Desquelz copz et batures ledit Martin de LHOMMEL coucha longtemps mallade au lit.

Et environ trois sepmaines après, lesdits Merin et Martin DESCENDRES et Vincent THOULOUSE vindrent boire audit cabaret. Et après qu’ilz se furent partiz d’illecq, allèrent parmy le villaige dudit Givenchy, où ilz trouvèrent couchiez ledit Jehan suppliant et Anthoine de LHOMMEL son frère auprès d’une haye quy ne pensoient à riens. Et lors ledit Vincent THOULOUSE dit audit Jehan de LHOMMEL qui avoit demandé comment son beau frère se portoit, disant oultre ces motz : et puisque tu le demande, viencha il le te diray. Et veant lesdits suplians que lesdits DESCENDRES et THOULOUSE n’estoient contens de l’outraige qu’ilz avoient fait audit Martin de LHOMMEL leur père, lequel gisoit encoires mallade au lit, à cause desdites batures, ains qu’ilz les vouloient aussi outrager, se levèrent de la place et sans respondre aucune chose affin d’éviter noise, se retirèrent en leur maison. Mais lesdits DESCENDRES et TOULOUSE les voulurent sieuvir disans ces motz : allons, alons, il fault autant déboulir que gréneter, ce que les assistens empeschèrent en leur remonstrant que lesdits de LHOMMEL ne leur avoient riens fait ne dit. Mais, tantost après, lesdits Martin et Marin DESCENDRES non contens et avec eulx Jehan et Pierchon DESCENDRES tous frères, se embuschèrent au coing du murent Hammain, faisans de espier se lesdits suplians ne retourneroient. Et veans qu’ilz ne venoient poient, se retirèrent tous ensemble à la maison Martin DESCENDRES. Pendant lequel temps revindrent lesdits Jehan et Gilles de LHOMEL suplians et Robert de BUISSON et eulx estans à l’endroit dudit coing du muret, ung nommé Guinot CHEVALLIER qui estoit illec assiz, se leva et alla avec eulx embastonné d’une fourcque et s’en allèrent ensemble par les ruelles. Et environ ung quart d’heure après, lesdits DESCENDRES et TOULOUSE et lesdits LHOMMEL accompagnez desdits Robert de BUISSON et Quinot CHEVALLIER rencontrèrent l’un l’autre. Que lors, ilz commenchèrent eulx entrebatre et ruer l’un sur l’autre, tellement que ondit débat et conflict lesdits Merin, Martin et Pyerchon DESCENDRES furent fort bleschiez en la teste et ailleurs. Au moyen desquelles bleschures, lesdits Merin et Martin DESCENDRES, par faulte de bon appareil, garde ou autrement, sont allez de vie à trespas.

Et combien que iceulx suplians soient amérement desplaisans de l’advenue dudit cas, néantmoins doubtans rigeur de justice, ilz se sont absentez de noz pays et seigneuries esquelz ilz n’oseroient bonnement retourner, estre, converser ne demourer à leur totale désolation et destruction, se notre grace et miséricorde ne leur est sur ce impartie. Pour laquelle actendu ce que dit est, mesment que en tous autres cas, ilz ont tousiours esté bien famez et renommez, ilz nous ont très humblement supplié et requiz. Pourquoy nous, ces choses considérées et eu sur ce l’advis de noz bien amez les bailli ou son lieutenant et hommes de fiefz de notre chastel de Lens, ausdits Gilles et Jehan de LHOMMEL suplians, inclinans favorablement à leur dite supplication et requeste, et leur veullans en ceste partie préférer grace et miséricorde à rigeur de justice, avons ou cas dessusdit, quitté remis et pardonné, quittons remettons et pardonnons (…).

Donné en notre ville de Malines ou mois d’avril l’an de grace mil cincq cens vingt et six avant Pasques, et de noz règnes assavoir des Romains, de Germanie, etc le IX^e, et de Castille etx le XI^e ; par l’empereur en son conseil ; signé Verderue.