Jehan LE GRAND, d’Ayette près Le Bucquoy

(AD59, B1741, folio 222)

En 1523 près d’Arras, Jehan LE GRAND blesse mortellement Michiel LE BARBIER à qui il reproche de vendre du mauvais blé et d’être un traître au gouverneur d’Arras.

Charles etc, savoir faisons à tous présens et avenir, nous avoir receu l’umble supplicacion de Jehan LE GRAND , povre homme marié nagaires demourant au villaige d’Ayette près le Busquoy en notre pays d’Artois, contenant comment ou mois de juing XV^C vingt trois, ledit supliant accompaigné de Jehenne HURTAULT sa femme et tirant leur chemin vers notre ville d’Arras, menant une vache pour y vendre, craindant qu’elle ne leur fust prinse et pillée par les François lors nos ennemis. Et reposans oudit chemin assez près de notredite ville d’Arras, trouvèrent feu lors vivant Michiel LE BARBIER et ainsi estans assis et reposans, la femme dudit supliant en addreschant ses parolles audit feu luy demanda si ce avoit esté luy qui luy avoit vendu du mausvais bled et se il n’estoit pas le censier de Baliencourt. Que lors il respondit qu’il estoit censier de Baliencourt, mais il ne luy avoit vendu de blé. Et lors ledit feu demanda à Jehenne BLONDEL illec présente, si sa fille qui demouroit au villaige de Puysseulx ou Val vendoit du blé en son absence, laquelle respondit que non et comme il fait à croire , elle feist ladite responce pour ung mieulx pour ce qu’elle savoit bien que la fille dudit feu en avoit vendu à la femme dudit suppliant. Après lesquelles parolles ledit supliant dist que les censiers sur les frontières de France estoient si François qu’ilz feroient volontiers menger ordures aux povres gens de notredit pays d’Artois ausquels ilz vendoient leurs bledz à raison que ainsi il en avoit esté traictié et pluiseurs autres dudit pays. Que lors ledit feu luy respondist qu’il estoit fort quereleux disant : estes vous envieulx que nous sommes nentis ; vous en faisons nous de pis. A quoy ledit supliant réplicqua que ouy et que ceulx dudit villaige d’Ayette avoient estés prins des Français audit villaige de Busquoy par le moyen des femmes dudit Busquoy quy les avoient accusez ausdits François. Que lors ladite Jehenne BLONDEL dist audit suppliant que personne du Busquoy ne les avoit accusez, à laquelle il respondist qu’elle avoit menty. Sievant lesquelles parolles ledit feu dit audit suppliant qu’il estoit meschant homme de desmentir ladite Jehenne qui estoit femme de bien. Auquel ledit suppliant respondit qu’il en avoit semblablement menty, luy imposant qu’il estoit traittre au gouverneur d’Arras et qu’il s’en yroit devant à la porte en advertir ceulx quy y estoient. Lequel deffunct cheminant devant ledit suppliant retourna et vint vers iceluy supliant ayant une vergette blanche en sa main et en le aprochant dist : viencha veulx tu dire et maintenir que je suis traittre au gouverneur d’Arras. Que lors ledit supliant allant vers ledit feu et craindant la fureur d’iceluy et qu’il ne luy feist invahyr, le congnoissant homme audacieux comme il monstra par après, ayant une espée d’arme sans fourreau en frappa ledit feu au costé senestre, qui subit prinst ladite espée et en fut bleschié en ses doiz, rua ledit suppliant par terre. Et n’eust esté qu’il fust déséparé par ceulx qui estoient présens, il eust esté en péril de sa vie et se fust ledit feu efforcha luy oster ladite espée. A l’occasion duquel cop par faulte de soing ou autrement comme il fait à doubter, environ sept ou huit jours ensievant ledit feu finit ses jours. Duquel cas ledit supliant est très dolent et pour doubte et rénérence de justice s’est depuis retiré et tousiours tenu en lieu de sceureté, habandonnant sadite femme et famille et ne oseroit aller ne converser en noz pays et terres, ains est apparant misérablement finir ses jours en estranges marches et contrées se notre grace et miséricorde ne luy est sur ce impartie. (…)

Donné en notre ville de Malines ou mois de mars l’an de grace mil cincq cens vingt neuf et de nos règnes assavoir de celuy des Romains le XI^e et de Castille et autres le XIIII^e ; soubzscript par l’empereur en son conseil ; signé VERDE RUE.

[viencha = ici : invahyr = attaquer ; estranges marches = pays étrangers limitrophes]