Anthoine LE GILLON, de Lens

(AD59, B1735, folio 48)

En 1523 à Lens, Anthoine LE GILLON et Lanselot de L’ABBAYE boivent et mangent ensemble dans une taverne . Ils jouent ensuite à un jeu de dés, et le premier gagne un patard que le second refuse de lui donner. S’ensuit une bagarre dans la rue, au cours de laquelle Lanselot est tué d’un coup de javeline.

Charles, scavoir faisons à tous présens et avenir, nous avoir receu l’umble supplicacion de Anthoine LE GILLON, homme marié chargié de femme et pluiseurs enfans, demourant en notre ville de Lens en notre conté d’Artois, contenant comme certain jour passé ledict supliant fut requis par feu lors vivant Lanselot de L’ABBAYE dit Luc, à le compaionner à boire ung pot de vin en certaine taverne en notredicte ville de Lens, ce que ledict supliant fist. Et aprez avoir beu certaine espace de temps et fait bonne chière, ledict suppliant fut requis dudict feu Lanselot de faire ung momon à deux dez, ce que ledict suppliant lui accorda, et gaigna ledict momon qui valoit ung patart, et cuidant par ledict supliant prendre. Ledict patard fut retiré par ledict feu Lanselot, lequel fist refuz de bailler audict supliant. Quoy voiant par ledict supliant requist par pluiseurs foiz par belles parolles audict feu Lanselot qu’il lui vaulsist baillier son patart et qu’il le avoit gaigné, mais il fut refusant de ce faire. Au moyen de quoy, parolles se meurent entre ledict supliant et ledict Lanselot, lequel mist main à son espée, jurant et détestant le nom de Dieu, qu’il ne délivroit ledict patart, monstrant semblant de vouloir oultragier ledict suppliant, et craindant estre vilonné dudict Lanselot par ce qu’il n’avoit espée ne baston pour soy deffendre, congnoissant ledict feu estre fort querelleux et dangereulx, sortit de ladicte chambre et taverne. Et estant parti d’icelle, alla en sa maison, laquelle est prochaine de ladicte taverne, ne y a que la parois entre deux. Et aiant recordacion d’injure à lui faite par ledict feu Lanselot pour demander le sien, meisment qu’il avoit esté contraint partir de la place non avoir povoir de réfréner son courroux. Et de chaulde colle prinst et saisist une javeline de barde et garny d’icelle retourna vers ladicte taverne. Et estant venu en la court d’icelle, ledict supliant perchut ledict Lanselot, lequel estoit sorti de ladicte taverne. Que lors ledict supliant se approcha de lui , en lui demandant se il estoit homme pour lui dire les parolles qu’il lui avoit dit et en rigoreulx parler lui dist qu’il lui délivrast son patart, et qu’il n’estoit homme pour lui emporter le sien. Au moyen desquelles parolles, ledict feu Lanselot mist main à son espée, le daisgaigna et ledict supliant avalla sa javeline et d’icelle frappa et lancha aprez ledict feu, tellement que aprez pluiseurs copz ruez tant de l’un que de l’autre, ledict supliant attaindist ledict feu du fer de sa javeline et d’un cop de taille sur la teste. Au moyen duquel cop ledict feu Lanselot cincq ou six jours aprez est terminé vie par mort.(…)

Donné en notre ville de Malines le jour du Vendredi Saint ou mois de mars l’an de grace mil cincq cens vingt et trois, et de noz règnes assavoir de cellui des Romains et Hongrie le cincquiesme et des Espaignes le huitiesme ; par l’empereur en son conseil.

[détester = proférer des imprécations contre quelqu’un ; vilonner = rudoyer ; recordacion = souvenir ; barde = armure ; avaler sa javeline = abattre sa javeline]