Jehan LE GENTIL, à Arras

(AD59 B1736, folio 108v)

En 1525 dans une taverne à Arras, Vincent BARBET demande à Jehan LE GENTIL de lui prêter six deniers. Ce dernier lui répond qu’il ne le peut ce jour. Vincent s’emporte et frappe Jehan à coups de pots à bière. Jehan LE GENTIL donne alors deux coups de couteau à son agresseur, le blessant mortellement.

Charles, etc, scavoir faisons à tous présens et avenir, nous avoir receu l’umble supplicacion de Jehan LE GENTIL, povre homme du mestier de sayeteur, résident en notre ville d’Arras, contenant que environ par ung samedi, icellui suppliant fut requis d’un nommé Jehan MOLIN aussi sayeteur demourant en icelle ville, de le vouloir aider à mettre sus une flame de fille de sayette pour faire une saye, ce que ledict suppliant feist. Et aprez qu’ilz olrent ce fait, s’en allèrent pour rechiner au cabaret des Couteaux à Pointes en notredicte ville, où ilz demandèrent à deux, demy lot de cervoise. Et depuis se mirent avec ung autre escot auprès de où estoient Pierre de BAIX et son beau-frère, où ilz despendirent pour leur part de l’escot, trois deniers.Au boult de laquelle table estoit à présent deffunct Vincent BARBET, lequel estoit seul aiant demy lot de cervoise devant lui. Et ainsi que lesdicts supliant et Jehan MOLIN estoient prestz pour eulx en aller, ledict deffunct demanda audict supliant qu’il lui prestast six deniers. A quoy icelluy suppliant respondit ces motz : certes je n’en ay point, se j’en avoye je vous presteroie voluntiers, dont ledict deffunct se malcontenta, reprochant audict suppliant qu’il le povoit bien faire, et que autresfoiz il lui avoit bien presté cincq groz, à quoy icellui supliant respondit de rechief qu’il n’en avoit point pour l’heure. Mais ledict deffunct malcontent se leva de sa place garny d’un cousteau qui n’avoit point de mance, duquel il vint frapper ledict supliant qui estoit encoires assiz à son escot. Au moyen de quoy icellui supliant soy sentant ainsi férir, poursuyt ledict deffunct jusdques au coing de la salle, et ce fait se retira arrière dudict deffunct, lequel non content poursuyt de rechief ledict supliant jusques à son escot, où icellui deffunct print ung pot de lot, duquel il frappa pluiseurs cops sur ledict supliant, lequel est petit homme se mussoit et garandissoit dudict deffunct il eust esté tué. Quoy voiant ledict suppliant soy sentant ainsi agressé et tout fourdoyé et estourdy des cops qu’il avoit receu, frappa sur ledict deffunct de son cousteau deux cops, l’un au bras l’autre en la gorge, desquelz cops peu de temps après par faulte de brief secours, appareil ou autrement, ledict feu seroit allé de vie à trespas. (…)

Donné en notre ville de Boisleduc ou mois d’octobre l’an de grace mil cincq cens vingt et cincq, et de noz règnes assavoir des Romains le VIII^e et des Espaignes le X^e ; par l’empereur en son conseil, signé Verderue.

[saie = vêtement riche ; mance = manche ; se musser = se cacher ; rechiner = prendre une collation]