Jacques LE CUVELIER, d’Ambrines

(AD59, B1741, folio 129v)

En 1526 à Houvin, Jacques LE CUVELIER tue Mathieu LEGAY dans une bagarre causée par Melcir BOQUET qui voulait en découdre avec tout le monde.

Charles, etc, savoir faisons à tous présens et avenir, nous avoir receu l’umble supplication de Jacques LE CUVELIER, saietteur, josne compaignon à marier, du villaige d’Ambrines en notre pays et conté d’Artois, contenant comme ou mois de mai XV^C XXVI le jour et solempnité du Saint Sacrement, ledit supliant, après avoir esté et oy la messe paroicialle dudit Ambrines, se seroit d’ilec party seul pour s’en aller au vilaige de Houvun distant environ d’une lieue dudit Ambrines, à intencion de veoir les dansses et esbatemens qui se faisoient audit Houvun, à cause de la feste dudit lieu comme faisoient pluiseurs autres des villaiges circonvoisins. Et aprez que iceluy supliant fut certainne espace de temps ilec, il alla environ deux ou trois heures au lieu où lesdites dansses et esbatemens se faisoient, sans penser à quelque mal. Auquel lieu il trouva pluiseurs josnes compaignons dudit Ambrines, ensemble des villaiges de Rieulecourt et Maisières, lesquelz danssoient en ladite dansse et entre autres y estoient trois des filz de Anthoine GOSSON censier dudit Ambrines et autres compaignons dudit villaige de Rieullecourt, que ledit supliant ne cognoissoit, sinon que ung nommé Anthoine MARTIN qui estoit embastonné d’une arbalestre et se y estoient aussi aucuns compaignons dudit villaige de Maisières, comme Melcir BOQUET, Mathieu LEGAY et Jehennet LEGAY son cousin germain, acompaigniez de pluiseurs autres compaignons. Lequel Melcir BOSQUET, qui est homme assez noisif, se adressa à ung josne filz d’Ambringnes nommé Loys MARLIN en luy demandant s’il vouloit qu’il luy donne deux cops de rapière pour la pareille. A quoy ledit MARLIN respondit qu’il ne volloit nulz coups et si n’en voulloir nulz donner à personne. Et ung peu de temps aprez environ six heures du soir, ledit Melcir meut débat contre les filz dudit Anthoine GOSSON. Lequel débat fut rompu de pluiseurs gens par deux foiz, mais ledit Melciore se voulloit contenter veullant tousiours recommencer. Tellement que iceluy débat fut groz et y estoient, de la bende dudit Melcir, Vallet LEGAY et autres, et du costé desdits enffans Anthoine GOSSON ledit supliant avec autres. Ouquel conflict et débat y en eut pluisuers navrez tant d’un costé comme de l’autre et ledit supliant ayant une arbalestre et receut pluiseurs cops tant dudit Melcir comme dudit Vallet LEGAY. Durant lequel débat ledit Mathieu LEGAY, cousin germain dudit Vallet, se fourra audit débat, ayant sa rapière nue en sa main pour y mettre le bien, comme ledit supliant a depuis entendu. Néantmoins iceluy supliant, lors ignorant ce, meimes entendant que ledit Mathieu LEGAY se meyt du costé dudit Vallet LEGAY son cousin germain, allencontre de luy supliant et autres ses consors, pour leur nuyre et grever, il de chaude colle auroit frappé ung seul cop d’espée sur la teste dudit Mathieu LEGAY, duquel trois ou quatre jours aprez il esta llé de vie à trespas. (…)

Donné en notre ville de Malines ou mois d’avril l’an de grace mil cinc cens et trente, et de noz règnes assavoir des Romains de Germanie etc le XI^e et de Castille et autres le XIIII^e ; soubscript par l’empereur en son conseil et signé du secrétaire DESPLEGHEM.