Nicolas LE CARON, à Arras

(AD59, B1734, folio 32v)

En 1523 chez un tassetier d’Arras, Nicolas LE CARON sergent du gouverneur veur mettre fin à une querelle entre plusieurs hallebardiesr de la même compagnie. Cette noise d’envenime et dégénère en bataille rangée. A un moment donné, une femme veut s’interposer entre les participants et reçoit de la part de Nicolas un coup mortel de rapière. Ce fait divers est dramatique car cette femme est enceinte et qu’avant de mourir elle met au monde son enfant, vivant semble t-il.

Charles etc, savoir faisons à tous présens et avenir, nous avoir receu l’umble supplicacion de Nicolas LE CARON, sergant de notre gouverneur d’Arras, contenant comme le joedi XVI^e jour d’avril en cest an XV^C XXIII, luy estant en devises à l’estat d’ung tassetier nommé Jehan DUPUICH de la Rouge Maison en notredite ville d’Arras, veit sourdir grosse noise entre Loys JOURDOIS dit le Paige et Noël LE BARBIER par ensemble, alencontre d’ung nommé Gilles LE LACQUÈRE pour y mettre le bien, considéré qu’ilz estoient tous ses compaingnons et bons amis et tous trois hallebardiers de notredit gouverneur d’Arras, cuidant qu’il feroit plaisir et honneur audit gouverneur de empescher ces gens de eulx entrebatre à intencion de les desmeller et départir, se approcha d’eulx leur requerrant et remonstrant doulcement qu’ilz ne feissent desplaisir l’un à l’autre, les advisant que se on leur vouloit faire desplaisir, qu’ilz se deubvroient ayder et assister l’ung l’autre actendu qu’ilz estoient à ung maistre, leur disant par diverses fois : messieurs que voulez vous faire, vous êtes tous à ung maistre, espérant qu’ilz prendroient lesdites parolles de bonne part et en ce, leur avoir fait grant plaisir. Et à ceste cause et intencion, se meist au devant desdits LE PAIGE et LE BARBIER lesquelz estoient en grande apparance eulx deulx ensemble tuer ou inhumainement oultraigier ledit Gros Gilles. Mais ledit PAIGE estant esmeu dit audit suppliant : t’en vouls tu mesler. A quoy il respondist que non, mais s’il povoit qu’ilz ne feroient nul mal et saisist par familiarité leurs hallebardes. Et incontinent ledit PAIGE s’escouyst dudit suppliant et le frappa rudement de son poing. Ce voyant ledit suppliant tira ung cousteau qu’il avoit pour le faire cesser, considérant qu’il n’estoit pas bien entre hallebardes à main desgarnie. Et incontinent ledit LE PAIGE en jurant blasphémant et proférant ces motz : mort Dieu en veulx tu parler, lanchant de sa hallebarde d’estocq après ledit suppliant et pareillement ledit Noël LE BARBIER par ensemble. Et doubtant ledit suppliant, pour soy garander, tira une rapierre qu’il avoit à sa sainture. Et comme ledit Noël s’estoit escou de sa femme, laquelle s’estoit tenu au devant de luy affin de empescher oultraiger ledit Gros Gilles. Icelle femme de rechief se représenta au devant dudit débat en se lançant au cop d’estocq présenté par ledit suppliant alencontre desdits deulx hallebardes contre luy lancées et bassées. Et auparavant que ledit suppliant se eust advisé et perceu qu’elle se feust mise mise entre deulx, fut attainte dudit estocq, tout au dehors de la voulenté dudit suppliant, à son très grant regret et desplaisir. Et termina ladite femme tost après délivrée de son fruit qui fut baptisé. (…)

Donné en notre ville de Malines ou mois de may l’an de grace mil incq cens vingt et trois et de noz règnes assavoir de cely des Romains et de Hongrie etc le V^e et des Espaingnes etc le huitiesme ; par l’empereur en son conseil ; DEZOETE.

[en l’estat d’un tassetier = en la maison d’un fabricant de bourses, de poches en cuir ; s’escouyst = se délivra de l’emprise]