Guillaume de LATRE, d’Aix-en-Gohelle

(AD59, B1739, folio 170v)

En 1526 à Aix-en-Gohelle, Guillaume de LATRE tue dans un cabaret d’un coup d’épée à la cuisse Gilles HANU qui était ivre et avait insulté et bousculé une personne présente dans ladite taverne.

Charles etc, savoir faisons à tous présens et avenir, nous avoir receu l’umble supplicacion de Guillaume de LATRE, povre homme labourier chargié de femme et trois enfans, demourant au villaige d’Ayz en Gohelle en notre bailliage de Lens, contenant que le troisième jour de juing l’an XV^C XXVI ainsi que ledit supliant estoit avec pluiseurs autres à une noepces qui se faisoient audit villaige en la maison de Collard de MONS carbartier et regardoit l’esbatement. Survint illec à présent deffunct Gilles HANU dit Coppeau, garny d’une espée à sa chainture sans foureau, lequel avoit fort beu et se monstroit tout yvre, auquel ung nommé Lucques GIFFROY dit ces motz ou en substance : va t’en arrrière de nous, tu nous blescheras de ton espée. A quoy ledit feu respondit : qu’en as tu à faire le cu ta mère. Et sur ce bouta ledit Lucques arrière en sorte qu’il le feist tomber contre ledit suppliant, lequel s’en malcontenta et le repoussa contre ledit Gilles HANU, tellement que débat se meult entre eulx. Et après pluiseurs parolles injurieuses dictes l’ung contre l’autre, desgaingnèrent chacun leurs espées ruans l’un contre l’autre, de sorte que ledit HANU fut contraint de reculler arrière vers le chellier de ladite maison, sans qu’il fust lors aucunement bleschié, ce que ledit suppliant eust bien peu faire sans l’espargnier. Et en cest instant survint ung nommé Gilles SIFFLEUR cousin germain dudit supliant, embastonné d’un espieu sur lequel icellui deffunct rua aucuns cops comme aussi fist ledit SIFFLEUR de sondit espieu aprez ledit deffunct. Et ce veant, ledit suppliant qui estoit encoires meu de challeur et courroux se approcha dudit deffunct et de son espée lui donna ung cop d’estocq en la cuisse et ledit SIFFLEUR ung autre en la main. A cause desquelz cops ledit feu trois ou quatre jours après par faulte de bon appareil gouvernement ou autrement, est allé de vie à trespas. (…)

Donné en notre ville de bruxelles ou mois de janvier l’an de grace mil cinc cens vingt et sept et de noz règnes assavoir des Romains et Germanie le X^e et de Castille et autres le XI^e ; par l’empereur en son conseil ; VERDE RUE.