Piat LALIX, à Vimy

(AD59, B1734, folio 9v)

En 1521 dans un cabaret à Vimy, plusieurs compagnons de Liévin dont Piat LALIX offensent des consommateurs dont Cotin BRUNEL en refusant le verre que ces derniers veulent leur offfrir. S’ensuivent plusieurs bagarres en raison desquelles Cotin BRUNEL est tué d’un coup d’épée par Loys HERLAND. Piat LALIX présent lors de cet homicide demande son pardon.

Charles etc, savoir faisons à tous présens et avenir, nous avoir receu l’umble supplicacion de Piat LALIX, povre compaignon à marier, ontenant comme le dimence sixiesme jour d’avril quinze cens vingt et ung avant Pasques dernier passé, Loys HERLAND, Martin de MONTENESCOURT, ensemble ledit supliant et autres compaignons se soient trouvez au villaige de Vimy en notre gouvernance d’Arras, en la maison de Martin LE FEVRE cabaretier demourant audit lieu. En laquelle maison Pierre WAGON filz de Jehan, Toussains CHARLES, feu Cotin BRUNEL et pluiseurs autres compaignons dudit Vimy, l’un desquelz compaignons de Vimy présenta à boire en son platel audit Martin de MONTENESCOURT de Lévin (Liévin ?), lequel reffusa de boire parce que ledit compaignon de Vimy estoit malade. Et au contempt de ce, s’esmeut quelque petit débat et question entre lesdits compagnons de Lévin et Vimy, tellement qu’ilz ruèrent aucuns potz les ungs après les autres, meisment ledit Pierre WAGON desgaigna son espée et navra ledit Martin à sang courant et playe ouverte, lequel fut contraint soy absenter dudit cabaret pour soy faire penser. Ce fait lesdits de Lévin et Vimy firent paix ensemble et burent comme devant. Et ledit Martin retourné après qu’ilz eussent payé leur escot, lesdits de Lévin conclurent ensemble retourner audit Lévin et lesdits de Vimy s’en allèrent chacun en sa maison. Entre lesquelz de Vimy estoient lesdits Pierre WAGON et Valentin WAGON allans avec lesdits de Lévin jusques au cimentière dudit Vimy. Que lors ledit Martin aiant encoires souvenance de sa navrure, demanda ausdits compaignons s’il demoureroit ainsi navré et batu et ce disant desgaigna son espée et frappa après lesdits WAGONS lesquelz widèrent dudit cimentière, desgaignèrent leurs espées et vindrent sur ledit Martin. Que lors lesdits Loys HERLAND et supliant qui estoient avec ledit Martin desgaignèrent semblablement leurs espées, ruans aprez lesdits de Vimy, mais commençoit à départir ledit débat. Et ainsi que ledit Cotin BRUNEL deffunct, veant de loing ledit débat, y accourut garny d’un maillet de harnas. Et aiant depuis recouvré une espée de laquelle il assaillit lesdits Loys, Martin et supliant. Iceluy supliant fut audit conflict abatu et fort blesché. Et lors ledit Loys frappa ung cop d’espée en l’estomacq dudit Cotin BRUNEL, duquel cop ledit Cotin incontinent sur le champ ala de vie à trespas. Et combien que ledit supliant n’ait aucunement frapé ledit deffunct et qu’il a satisfait à partie intéressée, néantmoins doubtant rigueur de justice attendu qu’il estoit en la compaignie dudit Loys aiant desgaigné son espée, n’oseroit aller ne converser en noz pays et seigneuries, se notre grace ne lui soit sur ce impartie.(…)

Donné en notre ville de Malines ou mois de mars l’an de grace mil cincq cens et vingt deux et de noz règnes assavoir de cely des Romains et Hongrie le quatriesme et des Espaignes et autres le septiesme ; par l’empereur en son conseil ; L. DEZOETE visa.