Florens de LACTRE, à Arras

(AD59, B1737, folio 109v)

En 1525 à Arras, l’archer Florens de LACTRE en tue un autre Josset BLAN qui refusait de lui donner les six sols qu’il lui devait en partage d’un butin de guerre.

Charles etc, scavoir faisons à tous présens et avenir, nous avoir receu l’humble supplicacion de Florens de LACTRE, josne filz archier de noz ordonnances de la garnison de notre ville d’Arras, soubz la charge de notre cousin le seigneur du Roeux, contenant comme le mercredi environ la fin du mois de may l’an XV^C vingt cincq, kedit supliant tencontra ung nommé Dominique aussi archier de ladite compaignie, auquel il demanda s’ilz ne auroient riens du butin qu’ilz avoient fait à Bétencourt et aultres lieux, lequel luy respondit que ouy, et que Josset BLAN aussi archier et butinier avoit six solz pour luy. Le lendemain ensuyvant icellui supliant rencontra ledit Josset auquel il dit : Dominique m’a dit que avez six solz pour moy du butin de Bétencourt, lequel Josset luy respondit qu’il ne savoit s’il estoit escript ou billet et qu’il y regarderoit. Le lendemain jour du vendredy environ sept ou huyt heures du matin, trouva ledit Josset sur le petit marchié d’Arras qui se promenoit avecq aucuns hommes d’armes et archiers de ladite bende, auquel il dit : venez cha, ne me baillerez vous point les six solz que me devez pour mon butin. A quoy il fist responce : si feray, je vous payeray samedi ou dimenche, je n’ay point argent à ceste heure. Ce oyant par ledit supliant et saichant qu’il avoit argent assez luy dit ces motz : vous bavez vous de moy, vous me paierez voirement. Et aprez ses parolles ledit supliant se partit de luy malcontent, se pourmenant aucune espace de temps sur ledit marchié et jusques à ce que ledit Josset se partit arrière des autres, que lors combien toutesvoyes que auparavant ils avoient tousiours esté bons amis ensamble, estant mary que pour si petite chose il reffusoit le payer et luy sembloit qu’il se gaudissoit de luy, se approcha dudit Joset en lui disant : Josset je vous prie que me baillez mon argent, sans plus parolles. Sur quoy il respondit : vecy bon gallant je n’en feray riens. Et il supliant dit que si feroit, et incontinent desgaingnèrent leurs espées et ruèrent pluiseurs cops l’un sur l’autre, tellement que luy supliant de cops de taille de son espée blessecha ledit Josset, un cop ou coeutre, ung autre en l’espaulle et ung en la gorge, duquel il cheit par terre, et brief après alla de vie à trespas. (…)

Donné en notre ville de Malines le jour du bon vendredy ou mois de mars l’an de grace mil cincq cens vingt et cincq, et de noz règnes assavoir des ceulx des Romains etc le VIII^e et de Castille etc le onziesme.

[voirement = en vérité, assurément ; baver = dire des niaiseries ; gaudir = se moquer, railler ; vecy = voici ; galant = bon compagnon]