Jehan HUGOT,de Thélus

(A59, B1735, folio 4)

En 1517 à Vimy, Jehan HUGOT et Pierre MOREL boivent ensemble dans une taverne. Au moment de payer, disant à Pierre qu’il lui doit de l’argent, Jehan lui propose de payer son addition, ce qui diminuerait sa dette d’autant. Pierre refuse et une dispute s’élève. Peu après Jehan tue Pierre d’un coup de bâton sur la tête. Il est possible que Pierre n’ait eu aucune dette envers Jehan.

Charles, etc, scavoir faisons à tous présens et avenir, nous avoir receu l’umble suplicacion de Jehan HUGOT, povre homme du villaige de Thelluch en notre pays et conté d’Artois, chargé de femme et huit enfans, contenant comme le jour de Notre Dame la Chandeleur, l’an XV^C XVII, ledict supliant se trouva au disner en la maison de Martin BRIDUEL, tavernier demourant au petit Vimy, en la compaignie de Pierre MOREL à présent defunct, où ilz disnèrent ensemble tout paisiblement avec pluiseurs personnes. Et ce fait lesdicts supliant, Pierre MOREL et ung nommé Pierre WATEBLED conclurent encoires boire au Grant Vimy en la maison de François LE GRANT, où ilz burent ensemble et despendirent deux solz à une table auprès de Gilles FAUCQUET et autres dudict Vimy. Et affin de trouver manière de gaigner lesdicts deux solz, icellui supliant pria doulcement audict Pierre MOREL deffunct vouloir payer ledict escot, tant moins de ce qu’il luy devoit, ce que ledict deffunct ne vouloit faire. Sur quoy s’esmeurent pluiseurs parolles iniurieuses l’un contre l’autre, tellement que ledict deffunct print le couteau dudict Gilles FAUCQUET pour en frapper ledict supliant, lequel couteau luy fut osté des mains par ledict Gilles. Après lesquelles choses icellui defunct Pierre MOREL se partist d’illec garny d’un baston et redon de fagot, et longue espace après son partement, lesdicts supliant et WATEBLED partirent de ladicte taverne et et avec eulx Jehan ESCAILLEBERT de Vimy, pour aller en sa maison qui estoit au chemin pour par lesdit supliant et WATEBLED partirent de ladicte taverne et avec eulx Jehan ESCAILLEBERT de Vimy, pour aller en sa maison qui estoit au chemin pour par lesdicts supliant et WATEBLED retourner en leus maisons audict Thelluch distant du quart de lieue dudict Vimy, non pensant trouver ledict deffunct qu’ils entendoient désia estre en sa maison, lequel MOREL ils trouvèrent sur le chemin garny dudict redon de fagot, et lors icellui deffunct demanda audict supliant pourquoy il avoit dit qu’il lui devoit, et disant ces motz : si je te dois, je te paierai bien, vint audict supliant et leva ledict redon de fagot pour le fraper, quoy voiant ledict suppliant craindant qu’il lui feist desplaisir, de chaulde colle et entendant seullement soy deffendre, d’un baston qu’il avoit frappa ledict deffunct sur la teste, tellement qu’il cheit à terre. Et lors ledict supliant qui n’entendoit l’avoir si fort blesché retourna audict Vimy et avec lui ledict WATEBLED tous surprins de boire. Et tantost aprez lesdicts supliant et SCAILLEBERT allèrent veoir ledict deffunct qu’ilz trouvèrent couché par terre, lui demandant par ledict SCAILLEBERT qui l’avoit ainsi batu. A quoy il respondit que ledict supliant l’avoit fait, et néantmoins icellui supliant incongneu dudict deffunct aida à le porter audict Vimy. Et peu de temps aprez par mauvaise garde ou autrement est allé de vie à trespas.(…)

Donné en notre ville de Malines ou mois de janvier l’an de grace mil cincq cens vingt trois, et de noz règnes assavoir de celuy des Romains et hongrie le cincquiesme, et des Espaignes le huitiesme ; par l’empereur en son conseil ; signé Dezocte.