Jehan HOGUET, d’Averdoingt

(AD59, B1740, folio 80)

En 1517 à Neuville-Saint-Vaast, Jehan HOGUET blesse mortellement d’un coup d’épée Bertrand SERRE qui refusait de payer audit Jehan une partie du repas pris en commun au cabaret.

Charles etc, scavoir faisons à tous présens et advenir, nous avoir receu l’umble suplicacion de Jehan HOGUET mannouvrier, povre homme chargié de femme et quatre petis enfans, natif du villaige d’Averdoing ou conté de Saint Pol, contenant que environ à douze ans, que lors il se tenoit ou villaige de Neufville Saint Vast lez notre ville d’Arras, il se trouva au rechiner ou cabaret dudit Neufville, où se tenoit Vaspasien PLOUVIER avec Anthoine HOGUET frère dudit supliant, Bertran SERRE et deux des cousins dudit Bertrand. Et aprez avoir passé le temps au jeu de pierre, où ledit Bertran avoit perdu contre ledit Jehan HOGHET supliant et aians bien beu et fait bonne chière ensemble sans noize ou débat, commenchèrent à parler de gaingnier l’escot. Et pour ce faire, ledit supliant pria audit Bertrand en volloir payer une partie pour sa perte dudit jeu, ce qu’il ne voullut faire. Au moien de quoy se meurent parolles et noises entre eulx et fut icelluy supliant iniurié par ledit Bertrand. Ce oyant, ledit suppliant print ung pot de terre sur la table et le voullut ruer aprez ledit Bertrand, ce quy fut empesché par les autres et par ledit Vaspasien. Et craindant ledit supliant que ledit Bertrand quy estoit esmeu fort et puissant, ne luy feyst desplaisir, icelluy suppliant esmeu et en chaulde colle, print son espée qui estoit sur la table et en donna ung petit cop d’estocq en la poictrine d’icelluy Bertrand. Ce fait, ledit supliant alla en sa maison et ledit Bertran en la sienne, y print ung baston et atout icelluy fut trouvé mort par terre auprez de la maison dudit supliant.

Obstant lequel cas doubtant rigeur de justice, il s’est absenté du pays et soy tousiours tenu en lieu seur, vivant avec desdits femme et enffans en grant povreté et misère et n’y oseroit hanter ne converser (…).

Donné en notre ville de Bruxelles ou moys de may l’an de grace mil cinc cens vingt neuf, et de noz règnes ascavoir de celluy des Rommains etc le XI^e et de Castille etc le XIII^e ; soubscrit par l’empereur en son conseil ; signé de ZOETE.