Pierre de HESDIN, à Camblain-l’Abbé

(AD59, B 1740, folio 132v)

En 1526 à Camblain-l’Abbé, Pierre de HESDIN tue Jehan DU WERP avec qui il s’était querellé, ce dernier étant jaloux du fait que le suppliant aime la même fille que lui.

Charles etc, savoir faisons à tous présens et avenir, nous avoir receu l’umble suplication de Pierre de HESDIN filz de Jehan, josne filz à marier de son stil maressal, demourant pour le présent au villaige de Servin en notre pays et conté d’Artois, contenant comme ou mois d’aoust l’an mil cincq cens vingt six, que lors il estoit résident et demourant en la maison dudit Jehan de HESDIN son père au villaige de Cambelin l’Abbié en notredit conté d’Arois, ainsi que ledit supliant et avec luy ung nommé Jehennet SENESCHAL aussi josne filz à marier lors demourant audit lieu, par ung jour de dimence environ l’heure de dix heures en la nuit allèrent jouer avant les rues dudit Cambelain sans penser à aucun mal. Et combien que ledit supliant, ne sondit compaignon ne eussent jamais aucune chose mesdit ne meffait à ung nommé Jehan DU WERP, pour lors homme de guerre, aussi josne filz à marier demourant audit Cambelin, néantmoins iceluy Jehan embastonné d’une javeline et espée à son costé, meu de mauvais couraige et noncontent que icelluy supliant hantoit une joeune fille dont ledit Jehan estoit amoureux, comme deppuis il a entendu, arrriva à eulx et incontinent rua et lancha de sadite javeline après ledit suppliant, lequel feut de ce bien ebahy, par ce que comme dit est il ne luy avoit riens meffait. Et ce veant demanda audit DU WERP qui le mouvoit luy faire desplaisir, à quoy ledit Jehan dit audit supliant et sondit compaignon qu’ils estoient beaulx oiseaulx pour aller veoir les filles. Et en ce disant ledit supliant et ledit DU WERP ruèrent et frappèrent l’un après l’autre. Néantmoins icelluy supliant ne blescha point icelluy DU WERP, mays ce nonobstant icelluy SENESCHAL ne scet, ledit supliant à quelle occasion aprocha ledit et d’une espée qu’il avoit rua et frappa aprez luy tellement qu’il fut atteint en la teste et navré à plaie ouverte et sang courant, à cause de laquelle naverure et bleschure, par deffaulte de bon appareil, bon gouvernement ou autrement, ledit feu Jehan DU WERP environ cinc sepmaines ensuivant soit terminé vie par trespas. (…)

Donné en notre ville de Bruxelles ou mois de may l’an de grace mil cinc cens vingt et neuf et de noz règnes assavoir des Romains etc le XI^e et de Castille etc le XIII^e ; ainsi signé par l’empereur en son conseil ; signé VERDE RUE.