Loys de GRINCOURT, de Rullecourt

(AD59, B1741, folio 176v)

En 1530 à Houvin, Loys de GRINCOURT est mêlé à une bagarre avec des habitants de Maisières, au cours de laquelle Simon LE GAY est mortellement blessé.

Charles etc, savoir faisons à tous présens et avenir, nous avoir receu l’umble supplication de Loys de GRINCOURT, josne compaignon povre simple homme marié du villaige de Rullecourt en notre pays et conté d’Artois, à présent prisonnier de la court Le Comte en notre ville d’Arras, contenant comme durant les guerres qui ont dernièrement régné en notre pays et conté d’Artois, au moien que ledit villaige estoit situé en frontière à demie lieue ou environ de la frontière de France et à trois petites lieues de Dourlens, où s’estoient retiré délaissans notre party les enffans BEDOUCH et pluiseurs autres REGNIEZ, qui faisoient en notredit pays d’Artois pluiseurs maulx larchins et pilleries, icelui supliant avoit esté constraint abandonner sa maison et résidence et son mestier du fait de la guerre et soubz le capitaine Frédéricq bastart de MELUN tenir garnison en notre ville de Béthune estant en la guerre. Et par la charge de sondit capitaine pour ce qu’il cognoissoit le pays et les passaiges des Français, il fut envoié avec autres ses compaignons pour surprendre lesdits BEDOULX et autres REGNIEZ, lesquelz debvoient lors faire course en notredit pays d’Artois comme ilz firent. Et furent trouvez et poursievyz par ledit supliant et sesdits compaignons tellement qu’ilz espéroient les ruer jus lors qu’ilz eussent fait, sans ce que le receveur de Humbercourt, lequel estoit en sauvegarde et neutralité et partant ne debvoit assister aux gens de guerre d’un parti ou d’autre, les eust sauvé au chasteau dudit lieu de Humbercourt. Dont adverty ledit capitaine et autres des villes de notredit pays d’Artois, qui désiroient la desfaite desdits BEDOULX et REGNIEZ, comme aussi faisoit le commun peuple et à ces fins l’on avoit fait sur lesdits BEDOULX et REGNIEZ pluiseurs embusches, en furent très malcontens et à ceste cause dirent qu’ilz le prenissent. Sievant quoy il supliant et aucuns autres ses compaignons en nombre de deux ou trois, allans à leur adventure sur les ennemis, trouvèrent ledit receveur lequel ilz prindrent prisonnier de guerre. Et le veullant amener au lieu de leur garnison, dont pour eschaper, cognoissant ledit receveur qu’il avoit mesprins et qu’il pourroit tomber en grosse ranchon pour redurer la peine en laquelle il povoit estre escheu, pour comme l’effect de sadite sauvegarde avoir assisté et sauvé audit chasteau de Humbercourt lesdits BEDOULX et autres REGNIEZ, il avoit traicté et paciffié avecq ledit suppliant et sesdits compaignons, ausquels et chacun d’eulx il avoit donné six ou huyt escuz d’or, desquelz iceulx suplians et compaignons avoient fait renseing à leur capitaine et luy faire satisfaire ses droiz.

Et depuis lequel cas ainsy commis et que l’abstinence de ladite guerre avoit esté traitée et publiée d’entre nous et les François, la première année d’icelle le supliant estoit retiré en sadite maison audit lieu de Rulcourt, pour y faire sa besoingne et vivre où il avoit acoustumé. Et par un jour de Saint Sacrement qui estoit la feste ou dédicasse du villaige de Houvin, distant dudit lieu de Rulcourt d’une lieue ou environ, il fut esloué par aucuns ses compaignons dudit villaige d’aller esbatre à ladite feste ce qu’il feyt, portant avec luy une espée à sa chainture et une hallebarde pour soy garandir ou desfendre se d’adventure quelqu’un le voulut oultraiger. Après qu’il fut arrivé audit lieu de Houvin, il fut requis d’aller bancqueter à la maison du censier d’illecq où il avet le filz du marissal d’Ambrines et autres, ils feyrent très bonne et joieuse chière, sans qu’ils dirent aucuns propos ou devises, ou préiudice de noise à quelque personne que ce fut. Et ce fait le bancquet finy se conclurent d’aller veoir ladite feste. En allant à laquelle, ils perceurent qu’il y avoit noise et que l’on crioit Rulcourt Ambrines, à quoy s’apercheurent et congneurent que c’estoient ceulx de Maisières d’un party, se débatirent contre ceulx des villaiges de Rulcourt et Ambrines d’autre et que au débat estoient en dangier les filz Jehan GOSSON censier dudit Ambrines. Pour secourir lesquels, luy supliant et le filz du marissal dudit Ambrines et aucuns autres compaignons, de leurs bastons y mirent le bien et tendirent par ce, de séparer la meslée. En quoy faisant ledit supliant par aucun des combatans, ne scet lequel, fut bleschié en la teste énormément et à sang, que au moyen de ladite bleschure il fut eschauffé et esmeu de colère, se fourroit audit débat auquel ung nommé Simon LE GAY dudit villaige de Masières fut blesché, dont quelque temps après par faulte de bon et soudain appareil termina ses jours. (…)

Donné en notre ville de Malines ou mois de may l’an de grace mil cinc cens et trente et de noz règnes assavoir des Romains de Germanie le XII^e et de Castille et autres le XIIII^e ; soubscript par l’empereur en son conseil et signé DESPLEGHEM.

[ruer jus = mettre à terre, anéantir ; abstinence = suspension de la guerre ; le receveur de Humbercourt = la personne ayant accepté la capitulation d’Humbercourt]