Jennot et petit Jehan GOSSON, Thonin MERLIN et petit Jehan BRACQUART, de Rullecourt

(AD59, B1737, folio 64)

En 1526 à la ducasse d’Houvin, Melcior BOSQUET cherche querelle, sans motif apparent mais étant certainement pris de boisson, au charretier d’un des suppliants. S’ensuit une bataille rangée qui dégénère, au cours de laquelle Mathieu LEGAY est tué par Cottin LE CUVELLIER. Bien qu’ils ne soient pas les auteurs directs du décès, les suppliants se sont enfuis d’Artois, craignant d’être inquiétés.

Charles etc, savoir faisons à tous présens et avenir, nous avoir receu l’umble suplicacion de Jennot et petit Jehan GOSSON frères, Thonin MERLIN et petit Jehan BRACQUART, joisnes compaignons à marier, contenant comment puis trois mois ençà lesdits suplians estans à Houvin en notre pays et conté d’Artois, que lors estoit le jour de la feste et dédicasse dudit lieu, et ainsy qu’ilz regardoient ladite feste, danses et esbatemens qui se y faisoient, environ cincq heures du soir, ung nommé Melcior BOSQUET sans quelque cause ou occasion desgaigna son espée qu’il avoit à son costé, dont il darda et rua pluiseurs cops après ung nommé Loys MAILLIN, josne compaignon à marier demourant ou villaige de Ambrinnes situé assez après dudit lieu de Houvin, combien que ledit Loys dit audit Melcior qu’il ne luy demandoit riens. Toutesvoyes ledit Melcior ne cessa ains ruoit et lanchoit de sadite espée, lequel débat par aucuns qui estoient venuz à ladite feste fut aucunement appaisé. Ce nonobstant ledit Melcior, garny de sadite espée nue, incontinent après s’approcha de Adriaen GOEUFFROY charton dudit Jennot GOSSON suppliant, lequel il frappa et blescha de sadite espée à sang courant et plaie ouverte en la teste. Quoy voyant ledit Jennot demanda audit Melcior qui luy avoit les bleschiez disant : que nous demandez vous, nous ne vous demandons riens, dont ledit Melcior esmeu commença plus fort à ruer et frapper, de sorte qu’il blescha griefvement d’un cop d’estoch ledit Jennot en l’aisselle dextre. Et véans par iceulx Jennot et Adrien estre ainsi aggressez et bleschez et esmeuz de couroux, commenchèrent à crier : Rullecourt, espérant que audit cry viendroient les gens qpour apaiser ledit Melcior. Auquel cry viendrent Thonin MERLIN supliant, Loys de GRINCOURT, Jehan de DOURLENS et autres pour y mectre le bien, sans lesquels ledit Melcior, à la mauvaise intention et volunté qu’il avoit, eult mis en danger de mort lesdits Jennot et GOEUFFROY. Et en continuant ledit débat, icelluy Melcior, assisté d’un nommé Varlet LE GAY, Robin DIÈTRE, DENIS et autres ses complices, garniz d’espées et bastons invasibles, mesmes ledit DENIS d’un arc à main, lesquelz ruèrent et frappèrent de leursdits bastons après ung chacun, tellement que ledit Melcior esmeut plus grant noise et débat que auparavant, mesmes tira ledit DENIS une flesche au doz dudit petit Jehan GOSSON supliant. Ouquel conflict ledit Jehan BRACQUART supliant fut navré par l’un des adhérens dudit Melcior d’un verderon au bras en deulx lieux, combien qu’il y mectoit le bien. Et fut ledit Thonin blesché au dessus de l’oeul. Ce veant, ledit Thonin qui n’entendoit que y mectre le bien, tira un cop d’un arbalestre qu’il avoit, et navra quelque peu ledit Varlet LEGAY. Et ce fait survindrent pluiseurs perrsonnes eulx mectans entre deux à intention de y mectre le bien, et entre autres Mathieu LEGAY à présent deffunct, lequel d’un cop d’espée qui lui fut donné par ung nommé Cotttin LE CUVELIER fut blesché en la teste, de laquelle bleschure cincq jours après il termina vie par mort.

Et combien que lesdits supplians n’ayent frappé ne lanché après ledit feu et ce qu’ilz ont daisgaigné leurs espées et ledit MERLIN tiré ledit trait, a esté pour eulx garder, deffendre et garandir contre ledit Melcior et ses complices, ausquelz fut pluiseurs fois remonstré qu’ilz se déportassent et ce que on ne leur demandoit riens. Néantmoins, à cause que iceulx suplians ont esté présens à l’advenue dudit cas comme dit est, ils se sont absentez pour aucun temps de notredit pays d’Artois, craindans que notre gouverneur d’Arras ne procède contre eulx à ban perpétuel ou autrement, rigoureusement pour raison dudit cas, et n’y oseroient hanter ne converser, se notre grace et miséricorde ne leur est sur ce impartie (…).

Donné en notre ville de Malines ou mois de juillet l’an de grace mil cinc cens et vingt six et de noz règnes assavoir des Rommains et Hongrie le IX^e et des Espaignes et autres le XI^e.