Jaquet GHELUY, d’Agnez-les-Duisans

(AD59, B1698, folio 77 v)

En 1471 à la ducasse d’Agnez-les-Duisans, Johannes OBRON déclare que les filles d’Agnez ne sont que harcelin. Cela déplaît à Pierre COMPERE qui cherche noise audit OBRON et ses compagnons, dont Jaquet GHELUY, lequel tue Pierre COMPERE d’un coup de dague au ventre, après avoir reçu de celui-ci un coup de bâton ferré à la tête.

Charles, etc, savoir faisons à tous présens et advenir, nous avoir receu l’umble supplicacion de Jaquet GHELUY, contenant comme le jour de la feste de la Trinité, en l’an mil CCCC LXXI, ledit suppliant avec Johannes OBRON, Gillet BAYART et Jehan BAYART, tous jeunes compaignons à marier, eust esté invité et semons par Jaquemart OBRON leur parent demourant à Agnez lez notre ville d’Arras, d’aller à la ducasse audit Agnez pour veoir les esbatemens d’illec, auquel lieu ilz allèrent. Et eulx illec estans les aucuns d’eulx avec pluiseurs autres se prindrent à danser et en dansant ledi Gillet BAYART demanda audit Johannes OBRON qui estoit appoyé contre une haye près de aldite danse pourquoi il ne dansoit. A quoy il répondi et dist ces parolles : pourquoy danseroie je, il n’y a mais icy que harcelin. Lesquelles parolles ung nommé Pierre COMPERE récita par autre manière disant à ses compaignons : acoustez cy, ceslui cy dit que ta sœur et les filles de ceste ville ne sont que harcelin, en demandant oultre à ung desdits compaignons dudit suppliant se les filles de leur ville estoient telles, lequel respondit que ouyl. Et sur ce, se meut grand débat de parolles entre lesdits compaignons, tant d’un costé que d’autre. Mais au moien de pluiseurs gens illec présens qui se mirent entre d’eulx, ilz se départirent à tant pour lors. Et ce meirent derechief lesdits suppliant et ses compaignons, à danser avec les filles et aucuns compaignons dudit Agnez. Mais ledit COMPERE s’en alla et revint tantost après atout pluiseurs de sesdits compaignons, armez et embastonnez de bastons invasibles. Et eulx arrivez à ladite danse, ledit COMPERE dist à sesdits compaignons en monstrant au doit ledit suppliant et ses compaignons qui dansoient et ne pensoient à nul mal : vela cellui qui a dit que les filles de ceste ville ne sont que harcelin. Et ce voiant, ledit suppliant qui estoit avec sesdits compaignons, demanda audit Pieret COMPERE : mon amy, pourquoi me monstrez vous ainsi au doit, ne vous plaît il point que je danse. Lequel COMPERE lui dist : tu as dit que les filles de ceste ville nesont que harcelin. A quoi il respondi : sauve votre honneur, et se je ay fait chose qui vous desplaise, je suy prest de l’amender. Et lors ledit COMPERE dist audit suppliant : tu as menty, tu l’az dit. Et icellui suppliant lui dist : demandez le à voz compaignons se je l’ay dit. A quoy l’un d’iceulx compaignons respondi : ouy tu l’as dit, disant oultre audit Pieret COMPERE : frappe, lequel COMPERE frappa ledit suppliant d’un baston ferré en la teste, tellement qu’il l’abati à terre. A quoy pluiseurs compaignons qui là estoient, cuidèrent obvier mais ilz ne peurent et ainsi qu’ilz se devisèrent pour apaisier lesdits parties, ledit supliant se releva et de sa daghe féry ou ventre ledit COMPERE, tellement qu’il demoura mort en la place. (…)

Donné en notre ville de Malines ou mois de novembre l’an de grace mil CCCC LXXVI ; ainsi signé par monseigneur le Duc à la relacion du conseil ; de HONDECOMBRE visa.

[ouyl = oui ; à tant = aussitôt ; invasible = d’attaque ; sauve votre honneur = sans porter atteinte à votre honneur; obvier = faire obstacle ; harcelin = insulte voulant peut-être dire allumeuse, car harceler signifie provoquer, exciter, tourmenter]