Robert FUMERIE, à Arras

(AD59, B1734, folio 26v)

En 1523 à Arras durant la nuit, on sonne l’alarme. Robert FUMERIE se dirige vers les murailles et, en passant devant la maison de Nicolas ROGIER, il emprunte la chandelle qui se trouve devant la porte. Lorsque ce dernier s’en rend compte, une violente dispute éclate, au cours de laquelle le premier tue le second d’un coup de hallebarde.

Charles etc, savoir faisons à tous présens et avenir, nous avoir receu l’umble supplicacion de Robert FUMERIE, de son stil mareschal, povre homme chargié de femme et enffans et à présent homme de guerre soubz la charge et conduite du seigneur de VERNOEUL capitaine de notre cité d’Arras, contenant comme le dimenche XVII^e d’avril dernier passé, en cest an XV^C XXIII, Colart FUMERIE père dudit suppliant le vint visiter en ladite cité, lequel il festoya ledit jour en son logis tant au disner que au soupper. Or est il que, en la nuyt à l’heure de XI heures l’on sonna alarme de ladite cité. Que lors ledit suppliant se oyant sortit de sondit logis armé et embastonné pour aller sur la muraille. Et en alant par les rues crya à haulte voix par diverses foiz que chacun des manans et habitans d’icelle cité meist de la chandeille à son huys par ce que lors il faisoit brun. Et ainsy que ledit suppliant passoit pardevant la maison de feu lors vivant Nicolas ROGIER, en son vivant marchant demourant en icelle cité, pour tant mieulx veoir print ung petit chandelier et une chandeille qui ardoit au devant de la dite maison, laquelle il porta avec luy. Mais quant il fut arrivé auprès de ladite muraille, ledit feu Nicolas ROGIER, garny d’ung arcq et flesches, aborda à luy et de prime face et furieusement print ledit suppliant au corps en l’appellant traittre garçon et laron et autres parolles injurieuses, disant qu’il avoit desrobbé son chandellier et qu’il vouloit ravoir. Tellement que icellui suppliant ce veant et doubtant ou craindant, que icellui feu Nicolas ne luy tirast une flesche au travers du corps, d’une halbarde dont il estoit garny donna et frappa ung cop sur la teste dudit deffunct, duquel cop il tomba par terre. A cause de quoy icellui Nicolas par faulte de bon appareil, gouvernement ou autrement, termina le lendemain vie par mort. (…)

Donné en notre ville de Mlines ou mois de may l’an de grace mil cincq cens vingt et trois et de noz règnes assavoir de cely des Romains et Hongrie etc le IIII^e et des Espaingnes et autres le VIII^e ; par l’empereur en son conseil ; VERDE RUE.

[arder = brûler]