Gérard de LE RUE, à Arras

(AD59, B1736, folio 108)

En 1525, dans une taverne à Arras, Philippot de MORDACK homme grossier et querelleur, après des paroles malséantes envers l’hôtesse, frappe sans motif apparent la servante, et déclare que celle-ci est la maîtresse du tavernier Gérard de LE RUE. Ce dernier se fâche et après avoir reçu un coup d’épée de l’irrascible Philippot, il tue celui-ci d’un coup de poignard.

Charles, etc, scavoir faisons à tous présens et avenir, nous avoir receu l’umble suplicacion de Gérard de LE RUE, chargié de femme et pluiseurs petis enfans, demourant en notre ville d’Arras, contenant comment ou mois d’octobre dernier passé, ung nommé Philippot MORDACK de CARNINS, homme mal condicionné et rioteux, vint en sa maison audit lieu d’Arras, où ledit supliant pour gaingnier la vie de lui, ses femme et enfans, tient cabaret vendant cervoise, ouquel estoient pluiseurs personnes buvans en divers escoz. Et illec ledit CARNINS allant d’escot en escot, adressa ses parolles à la femme dudit suppliant, jurant et blasphémant le nom de Dieu, meismes regniant son nom, disant qu’il tueroit ledit suppliant son mary, afin de l’avoir à mariage. Ausquelles parolles ladite femme ne print garde autrement qu’elle fit audit feu : quant tu le aurois tué, je ne scay se je te vouldroie avoir à mariage. Et tost après ledit feu CARNINS wida de la chambre où il avoit dit lesdites parolles, et vint adressier à une nommé Mariette servante dudit suppliant, bonne et honneste fille, à laquelle il donna pluiseurs cops de sa main, tant sur la teste que au visaige,sans donner à congnoistre s’il le faisoit par courroux ou autrement. Et ce voyant par aucun illec estant, print ledit feu de CARNINS et l’emmena en la première chambre, où ledit supliant fut averti et lui fut rapporté les choses dites, dont il fut courrouchié et pour ce, demanda audit feu pourquoy il avoit souffleté et batu ladite servante, et quelle chose il lui demandoit. A quoy ledit feu jurant et blasphémant le nom de Dieu, meisment le regniant, respondit que c’estoit la ribaulde dudit suppliant, et qu’il en faisoit sa volunté. Ce que excusa ledit suppliant, disant que c’estoit mal dit, et qu’elle estoit bonne fille. Et soy démonstrant par ledit de CARNINS de ce malcontent, desgaigna une rapière qu’il avoit en sa main, et d’icelle lancha un cop d’estoc en l’ayne dudit supliant dont il a été fort navré. Parquoy ledit supliant ce veant et soy sentant ainsi bleschié et navré sans occasion, meu de chaulde colle print d’une main ladite rappière estant encoires en son ayne, et de l’autre main tira ung petit poingnart qu’il avoit à sa chainture, et en donna un cop en la teste dudit feu de CARNINS. A l’occasion duquel cop, par faulte de bon apapreil, gouvernement et autrement, ledit Philippot MORDACK aucun temps après, alla de vie à trespas.(…)

Donné en notre ville de Bruxelles ou mois de décembre l’an de grace mil cinc cens vingt et cincq, et de noz règnes assavoir des Romains le VIII^e et des Espaignes le X^e ; par l’empereur en son conseil ; signé Verderue.

[mal conditionné = de mauvais caractère ; rihoteux = querelleur]