Guillaume de LE PLAICE, de Camblain-l’Abbé

(AD59, B1740, folio 184v)

En 1525 à Villers-au-Bois, Guillaume de LE PLAICE tue d’un coup de couteau Jehan CLICQUET, après une querelle concernant la femme dudit CLICQUET à qui son mari avait jeté un pot de bière à la tête, et dont Guillaume voulait prendre la défense.

Charles etc, savoir faisons à tous présens et avenir, nous avoir receu l’umble suplicacion de Guillaume de LE PLAICE, povre homme éaigié de LIII ans, chargié de femme et pluiseurs enffans, demourant au villaige de Camblin en notre conté d’Artoys, contenant comme à quatre ans le premier jour de may, ledit suppliant pour soy récréer se trouva au cabaret de Villers au Boys en la maison d’Agnieulx CASTELET avec le curé dudit lieu, Jehan RASSE, Hacquinet TERRIER, défunct Jehan CLICQUET et autres.

Et pendant qu’ilz y buvoient survint la femme dudit CLICQUET, qui requist à sondit mary qu’il se gardast de soy enyvrer. Et sur ce sondit mary luy présenta à boire, quoy suynavant but ladite femme quelque peu. Et pour ce qu’elle ne beut tout ce qu’il luy avoit baillié, sondit mary se malcontenta et luy gecta le pot parmy la teste, dont elle fut abbattue par terre. Et néantmoins ledit CLICQUET à tout ung cousteau qu’il avoit, se leva de la table et s’approcha de sadite femme et blasphémant le nom de Dieu jura qu’il la tueroit, ce que ledit suppliant et autres assistens cuidèrent empescher. Dont courrouché ledit CLICQUET dit qu’il povit bien faire le plaisir de sa femme, s’approchant d’elle la blescha en la cuisse. Que lors se leva ledit suppliant et s’approchant dudit CLICQUET fut d’icelluy blesché au bras. Quoy veant ledit supliant et considérant que ledit feu avoit tort par ce qu’il ne luy demandoit rien, esmeu de courouch lencha d’un cousteau qu’il avoit et donna ung cop au ventre dudit CLICQUET, à l’occasion duquel cop par faulte de bon appareil et autrement il seroit aucun temps allé de vie à trespas.

Et jasoit que ledit cas soit commis par ledit suppliant comme constraint pour les insolences dudit CLICQUET et qu’il ayt traitté et satisfait à partie interressée, toutesvoies auroit esté constitué prisonnier par les gens de notre gouvernance d’Aras et mis ès prisons de La Court le Comte, où il est ancoires présentement détenu, et se doubte que l’on ne le veuille mettre ou dernier supplice, se ne luy est secouru de notre grace et miséricorde (…).

Donné en la cité de Cambray ou mois d’aoust l’an de grace mil cinc cens vingt neuf et de noz règnes assavoir des Rommains etc le XII^e et de Castille etc le XIII^e ; ainsi signé par l’empereur en son conseil ; signé DELANGHE.