Jehan CAUWET, de Valenciennes

(AD59, B1740, folio 106 v)

En 1520 à Arras, Jehan CAUWET tue d’un coup de couteau Gilles BRASSEUR qui lui avait donné un soufflet, car ce dernier était mécontent d’avoir dû payer sa part lors d’un repas pris en une taverne, alors qu’il espérait faire régler sa note par le père dudit suppliant.

Charles etc, savoir faisons à tous présens et avenir, nous avoir receu l’umble supplication de Jehan CAWET, saieteur à présent demourant en ceste notre ville de Valenciennes, contenant comme, ou moys d’octobre l’an XV^C et vingt, après que Gilles CAUWET père dudit supliant, Jehan BON VOISIN et feu Gilles BRASSEUR tanturier et autres, eussent soupé en la taverne de l’escu de Troye en notre ville d’Arras, où durant ledit souper n’y avoit eu aucunes parolles entre ledit supliant et Gilles BRASSEUR, fors seulement pour ce que icelluy supliant vouloit empescher que ledit Gilles CAUWET son père ne prestast l’escot, dont il estoit pressé. Et ledit Gilles BRASSEUR ne se contenta par ce qu’il fut constraint paier son escot, duquel il pensoit estre quitte, se ledit Gilles eult presté tout ledit escot. En sortant hors d’icelle taverne et l’escot payé et comme ledit Gilles BRASSEUR tenoit par le bras ledit Jehan BON VOISIN pour le remener, icelluy Gilles BRASSEUR peust donner ung soufflet audit supliant, estaindit la chandeille que icelluy supliant avoit en sa main pour convoier sondit père. Ce voant icelluy supliant, d’un long cousteau à clan, en donna et bailla audit Gilles BRASSEUR ung cop et l’ataindit vers la mamelle. Duquel cop il tombit par terre et fut bléché tellement que deux jours après il alla de vie à trespas. (…)

Donné en notre ville de Valenchiennes ou mois de juillet l’an de grace mil cinc cens vingt neuf, et de noz règnes assavoir des Rommains le XI^e et de Castille et autres le XIII^e ; ainsi signé par l’empereur en son conseil ; L. de ZOETE visa.