Jehan DU CAUROY, à Habarcq

(AD59, B1741, folio 264v)

En 1530 à Habarcq, Jehan DU CAUROY tue Nicolas LE CORDIER à la suite d’un différend dans une taverne, ce dernier reprochant au tavernier de n’avoir eu qu’un pain, Jehan soutenant le tavernier qui affirmait en avoir donné deux audit Nicolas.

Charles etc, savoir faisons à tous présens et avenir, nous avoir receu l’umble supplicacion de Jehan DU CAUROY dit Hannequin, faulconnier du seigneur de Habarcq, chargié de femme et enffans, demourant au villaige dudit Habarcq, contenant comme le X^e jour de juillet dernier passé par ung dimence, ledict suppliant ayant joué à la paulme, tost après pour se recréer seroit allé en la maison de Jehan de WANCQUETIN tavernier, où luy et le censier de Haultavesnes mandèrent de la bierre à ung bout de table. Et avant que ledict suppliant y arriva, il trouvat à ladicte table ung nommé Nicolas LE CORDIER dit Collinet, à présent deffunct, qui faisoit ung autre escot avec deux de ses compaignons et après que iceluy deffunct et ses compaignons eurent esté illecq certaine espace de temps, ilz volurent scavoir de l’hoste leur escot, lequel leur respondit qu’il estoit bon à savoir, et qu’ilz n’avoient eu que quatre lotz de cervoise et deux pains. En comptant lesquelz deux pains ledict deffunct dit et argua qu’ilz n’avoient eu que ung. Mais il luy fut par ceulx qui estoient à ladicte table dit qu’ilz avoient eu deux pains, toutesvoyes chacun de l’escot dudict deffunct disoit le point avoir prins. Et ce oyant par ledict suppliant, il dit qu’il le failloit cherger et esclaver à tous ceulx de la table, ce qui fut faict. Mais ledict pain ne fut point trouvé et dudict esclavement se malcontentoit assez ledict deffunct, demandant s’il sambloit qu’il y eust disette d’ung pain. A quoy ledict suppliant respondit pour ce qu’il n’avoit gaires de temps que l’on s’estoit venu plaindre à la dame dudict Habarcq dudict deffunct où ledict suppliant estoit présent, qu’il avoit prins et desrobé ung oison, qu’il n’avoit suspicion sur ledict deffunct au moien qu’il estoit mal famé et renommé. Et alors iceluy deffunct dit audict suppliant par deux ou trois fois qu’il estoit ung meschant homme. Et ledict suppliant luy respondit en demandant : m’appelez vous meschant homme, il n’y a point de plus meschant homme en la compaignie que vous. Proférant lesquelles parolles ledict deffunct print en sa main quelque chose sur la table et le rua après ledict suppliant dont il le asséna en la teste et en cest instant, par chaulde colle iceluy suppliant print un chandelier qui estoit sur la table et le rua après ledict deffunct, dont il fut bleschié à sancq et abbatu par terre. Et ce fait, pour éviter plus grant noise ledict suppliant se partyt de la maison dudict Jehan de WANCQUETIN pour s’en aller à sa maison et pour ce qu’il craindoit que ledict deffunct ne vint après luy, il s’en alla par les jardins sans aller son chemin accoustumé affin qu’il ne le trouva point. Et en allant à cause qu’il n’avoit point de baton, il recoeullit une manouelle de bois longue de deux ou trois piedz qu’il mit soubz son brach. Et ledit deffunct voyant que le suppliant s’en étoit allé le volut tousiours suivre pour le grever et oultragier, mais il fut aucun tamps détenu en la chambre par les assistens. Néantmoins il en partist et soubitement s’en alla en sa maison quérir une fourcque et vint chercer après ledict suppliant lequel estoit assez près de sa maison pour se retirer laissé de l’âme. Et cependant voir venir vers luy hativement ledict deffunct garny de ladicte fourcque pour l’oultraiger, auquel ledict suppliant ce voyant dit ces mots : Collinet ne me approcez point se vous ne me tuez tout rond, car je vous fauldray point. ce nonobstant ledict deffunctvint à lancher ladicte fourque après ledict suppliant quy la destourna d’ung palleto et entra soubz ladicte fourcque au moyen de quoy ledict deffunct ne poeult frapper et l’avoir d’estocq, mais il frappa de hault sur ledict suppliant, lequel tint ladicte fourcque en sa main et de ladicte manouelle de bois qu’il tenoit en sa main luy donna ung coup en la teste. Et durant qu’ilz tenoient à deux encoires ladicte fourcque, le suppliant frappa derechief de ladicte manouelle sur l’autre lez de la teste dudict deffunct. Et ce fait iceluy deffunct s’enfuit et ledict supliant rua après luy ladicte manouelle, mais il ne scet s’il le asséna. Desquelz coups ledict Nicolas LE CORDIER tomba tost après par terre, et illec seroit allé de vie à trespas.(…)

Donné en notre ville de Malines ou mois d’aoust l’an de grace mil cincq cens et trente et de noz règnes assavoir de l’empire le premier et de Castille et autres le XV^e ; soubzscript par l’empereur en son conseil ; signé HERDINCLE .

[cherger et esclaver= rendre responsables ; laissé de l’âme = ne voulant pas mourir]