Olivier CASTELLET, de Neuville-Saint-Vaast

(AD59, B1736, folio 33v)

En 1525 dans un cabaret à Neuville-Saint-Vaast, un homme de guerre demande à Simon DU FOEUL de lui prêter son escot, ce que ledit Simon accepte. Mais l’homme de guerre se ravise. S’ensuit une rixe au cours de laquelle Rolland CASTELLET tue le nommé Anthoine DU FOEUL. Olivier CASTELLET frère dudit Rolland implore le pardon bien que n’ayant pas participé à l’homicide.

Charles, etc, scavoir faisons à tous présens et avenir, nous avoir receu l’umble suplicacion de Olivier CASTELLET, povre jeusne compaignon à marier, demourant au villaige de Neufville Saint Vaast en notre pays et conté d’Arthois, contenant comme le mercredy XIX^e jour du mois d’avril dernier passé, il suppliant avec Rolland CASTELLET son frère, feu lors vivant Anthoine DU FOEUL et autres beurent ensemble au cabaret dudit lieu de Neufville, où semblablement estoient deux compaignons de guerre. Et après l’escot finy, l’ung desdits compaignons de guerre tint proppos et requist à ung nommé Simon DU FOEUL estant en ladite compaignie de prester ou emprunter ledit escot. Sur quoy icelluy Simon respondit qu’il devisast comment il le voloit prester ou qu’on luy prestast ledit escot. A laquelle demande icelluy compaignon de guerre dit qu’il le presteroit audit Simon sur la première coursse qu’il feroit en France, ou sur le premier argent qu’il receveroit de Nous pour ses gaiges et soldes, ou sur la première fois qu’il retourneroit audit lieu de Neufville, laquelle offre ledit Simon accepta. Mais depuis ladite acceptation, ledit compaignon de guerre rappella son mot, disant n’avoit point d’argent, impropérant audit Simon DU FOEUL plusieurs haultaines parolles et iniurieuses. Ausquelles icelluy Simon respondit et dit audit compaignon de guerre que sa mère estoit preude femme, et que par mort Dieu il le combatteroit baston à baston sur ceste querelle et qu’il estoit aussi bon gendarme comme luy. Pendant lesquelles parolles survint ledit Rolland CASTELLET frère dudit suppliant, lequel tenant ung cousteau nud en sa main, et d’icelluy frappant sur la table adressant ses parolles audit Symon DU FOEUL : dist mordieu qu’esse cy marissal, ne aye point défiance en moy, tu scez bien quel homme je suys, je ne laisseray point fouller ceulx avec qui je seray, car je suys trop franck. Ce oyant ledit deffunct Anthoine dist audit Rolland CASTELLET qu’il n’estoit point si franc qu’il disoit, puisqu’il souffroit plustost traveillier ceulx de sa ville, que ceulx de dehors. A raison de laquelle responce faicte par ledit feu Anthoine, icelluy Rolland tout malcontent wyda hors de l’assiette, ayant son espée nue en sa main, de laquelle il frappa plusieurs cops aprez ledit deffunct Anthoine, lequel se mectoit à deffence, en sorte que de la force des cops qu’ilz ruoyent l’un aprez l’autre, ilz tombèrent tous deulx par terre. Et fut icelluy deffunct bleschié en plusieurs lieux de son corps, par telle manière que souldainement il termina ses jours.

Et combien que ledit suppliant n’ait esté cause ne occasion dudit débat, ne aucunement feri, ne frappé aprez ledit deffunct, ne baillé ayde à sondit frère, néantmoins pour ce que aux bruyt et clameurs, que iceulx deffunct et Rolland faisoient en eulx débattans, ledit exposant saillit en la court dudit cabaret et qu’il estoit garny d’une broche rôtissoire de fer, et que atout icelle, aprez ledit cas et homicide commis, il assista ledit Rolland CASTELLET son frère, à soy solver et fuyr, il entend que l’on le veult charger et tenir coupable dudit homicide, à laquelle cause il n’oseroit pour doubte et rigueur de justice, ne hanter ne converser en noz pays et seigneuries .(…)

Donné en la ville de Bréda, ou mois de juillet l’an de grace mil cincq cens vingt et cincq, et de noz règnes assavoir des Romains et Hongrie etc le VIII^e et des Espaignes et de tous les autres le X^e ; ainsi soubsscript par l’empereur en son conseil et signé Verderue.

[impropérer = reprocher comme une chose honteuse ; preude femme = femme honnête, de mérite ; fouler = discréditer]