Jaques BREYLE, de Bruges

(AD59, B1738, folio 97v)

En 1521 à Arras, Jaques BREYLE frappe mortellement un certain Pierchon qui lui avait jeté un pot de cervoise sur le bras, étant sans doute jaloux du suppliant qui voulait s’approprier une fille dans un cabaret.

Charles, etc, savoir faisons à tous, présens et advenir, nous avoir receu l’umble supplicacion de Jaques BREYLE, natif de notre ville de Bruges, jeusne homme à marier, à présent serviteur et lacquay au conte de HOOCSTRATE, contenant comme cincq ans ou environ à la Pentecouste, icelluy suppliant lors estant en notre service comme homme de gherre soubz la charge du seigneur de Vernoeul, s’est trouvé à certain cabaret nommé Saint George, en notre ville d’Arras, accompaignié d’un nommé Pierchon, aussi serviteur à icellui seigneur de Vernoeul, ne set son sournom ne dont il estoit, et d’un autre compaignon, lequel semble il, ne anguoit avec eulx. Vint une fillette nommée Bonnette et aprez avoir beu certaine espasce jusques environ le disner, ledit supliant demanda ausdits compaignons à qui estoit icelle fille, lesdits compaignons respondirent qu’elle n’estoit à eulx. Sur quoy ledit supliant dit : si elle n’estoit à nulluy, elle est à moy, en paiant l’escot la cuidant embrasser sans violence. Ledit Pierchon, sans mot dire, print le pot à cervoise et le jetta aprez ledit supliant et l’atteintit au bras, de sorte que dudit coup il tomba par terre et endormit icelluy bras. Et pendant que ledit suppliant torcha son viaire de ladite cervoise, ladite fille et Pierchon s’enfuyrent et ledit Pierchon demoura à l’huys de la chambre avec son espée tirée. Ce veant par icellui suppliant dit : je vous demande riens, lors icellui Pierchon jurant la douleureuse mort et benoîtes playes de notre rédempteur Jésus Christ disant : vous voulez batre tout le monde, je vous asséneray maintenant, ou semblez motz en substance. Ledit supliant veant qu’il lui estoit besoing soy desfendre, ruèrent plusieurs coups l’un aprez l’autre, de sorte que ledit Pierchon, lequel estoit armé d’un bon buffle scrète et avant bras, receut un coup sur l’un d’iceulx, le cuidant d’icellui avant bras ruer à rien, le receut en son sen et de quoy il tomba à terre. Ce veant, ledit suppliant saillit oultre ledit Pierchon hors de ladite chambre sans lui faire autre mal, duquel coup trois jours ou environ il termina de vie à trespas.

Duquel cas icelluy suppliant est amérement repentant, et en fait satisfaction s’aucune en s’en trouver, et en a fait les debvoirs de soy en guerre (…).

Donné en notre ville de Malines le jour du Vendredi Saint ou mois d’avril l’an de grace mil V^C XXVI et de noz règnes assavoir des Romains et le VIII^e et de Castille et autres le XI^e ; par l’empereur en son conseil ; Dublioul visa.

[viaire = visage ; buffle = justaucorps que porte les gens de guerre en guise de cuirasse, c’est aussi la partie du casque protégeant les joues]