Huchon BOUTELOT, à Arras

(AD Lille B1735, folio 124)

En 1524 à Arras, quelques compagnons de guerre se récréent dans la rue avec un joueur de rebec qu’ils ont payé. Survient une bande de soldats qui prétendent avoir le musicien gratuitement. Une rixe éclate, et l’un de ces soldats est blessé mortellement.

Charles, etc, savoir faisons à tous présens et à venir, nous avoir receu l’umble suplication de Huchon BOUTELOT, Colin WAULTIER, Pierrotin BOULENGHIER et Jacotin de le PORTE, povres compaignons de geurre tenans garnison en notre ville et conduite d’Arras, contenant comment le XV^e jour d’aoust dernier passé, environ neuf heures du soir, lesdicts suplians se trouvèrent ensemble aians ung joueur de rebequet pour faire des hobades et eulx récréer. Et ainsi qu’ilz estoient en notredicte ville d’Arras, assez prez du carfour nommé la Place Castelain, survindrent illec sept ou huit compaignons de guerre doubz la charge du seigneur de Warluzel, lesquelz demandèrent ausdicts suplians qu’ilz faisoient dudict joueur, disans qu’ilz le vouloient avoir. A quoy lesdicts supplians respondirent tout gracieusement que en les payant ilz le bailleroient vonlentiers, et non autrement, attendu qu’il estoit à leurs gaiges et qu’ilz le avoient loué. Desquelles responces lesdicts compaignons se montrèrent malcontens, et en jurant et blasphémant le nom de Dieu, dirent ausdicts suplians qu’ilz les chasseroient couchier, et auroient ledict joueur sans payer. Et en enssivant, ce commencèrent à ruer de leurs bastons sur lesdicts suplians, sans eulx vouloir déporter, combien que iceulx suplians leur en requissent pluiseurs foiz en disant ces motz ou en substance : compaignons déportez vous, nous ne vous demandons riens, ce qu’ilz ne vouloient faire. Au moyen de quoy lesdicts suplians furent contrains eulx mettre à deffence, et firent tellement que lesdicts agresseurs se retirèrent sans leur faire aucun mal. Mais encoires non contens de ce, revindrent derechief en plus grand nombre, ruer sur lesdicts suplians qui estoient en petit nombre, et ne se eussent peu bonnement sauver, attendu le nombre desdicts agresseurs, à laquelle cause iceulx supplians pour sauver leurs vies se mirent encoires à deffence. Et en ce faisant, l’un d’iceulx supplians toucha l’un desdicts agresseurs nommé Jacque GOSSON sur la teste, duquel cop il cheyt à terre. Que lors lesdicts agresseurs ce voyans se retirèrent incontinent, sans qu’ilz furent poursuyz par lesdicts suplians, ainçois relevèrent ledict GOSSON estant à terre, tristes d’avoir esté contrains de ainsi le bleschier, en lui disant : compaignon, va toy faire penser, nous ne te demandons riens. Et à tant se retirèrent lesdicts suplians chacun en son logis, mais depuis ont oy dire que ledict GOSSON, certain temps après ledict débat faulte de pense cirurgien ou autrement, seroit allé de vie à trespas. ( …) Donné en notre ville de Malines ou mois de novembre l’an de grace mil cincq cens vingt et quatre, et de noz règnes assavoir des Romains et Hongrie le septiesme et des Espaignes le neufiesme ; par l’empereur en son conseil ; signé Verderue.

[ainçois = mais bien au contraire.]