Michault BOIZEVILLE, à Arras

(AD59, B1734, folio 69)

En 1523 deux hommes de guerre : Michault BOIZEVILLE et Symon LE CARON sont démobilisés et espèrent devenir hallebardiers à Arras, ce que leur promet le gouverneur dès qu’une place sera libre. Peu après Malin HELYON recommande le supliant au capitaine des hallebardiers, ce qui indispose Symon LE CARON qui cherche alors noise auxdits HELYON et BOIZEVILLE. Ce dernier finit par tuer LE CARON d’un coup d’épée dans la bouche.

Charles, etc, savoir faisons à tous présens et avenir, nous avoir receu l’umble supplicacion de Michault BOIZEVILLE, povre machon demourant à Blareville en notre conté d’Artois, chargié de femme et de pluiseurs petiz enffans, contenant que depuis l’encommencement de la présente guerre, ledit suppliant s’est continuellement occupé en notre service soubz divers capitaines et dernièrement lors que par la charge de notre cousin le conte de GARE capitaine et lieutenant général de noz pays et de conté de Flandres et Artois, furent mis sus aucuns piétons pour empescher le ravitaillement de la ville de Thérouane, ledit suppliant fut enrollé avec ung nommé Symon LE CARON dudit villaige de Blareville à présent deffunct, soubz le capitaine Frédéric de MELUN et fit le serment en tel cas requiz. Lesquelz piétons furent tost après ladite retenue cassez. A cause de quoy lesdits suppliant et deffunct Symon LE CARON furent requérir au visconte de GAND notre gouverneur d’Arras, leur donner et ottroyer place de hallebardier du nombre des cent qu’il y avoit en ladite ville, entendans que lors y olt aucunes places vacans, ce que n’estoit véritable. Touttesfois notredit gouverneur d’Arras, en faveur de gens de bien qui de ce le requirent, ottroya ausdits suppliant et deffunct Symon LE CARON la première place en ladite bende et compaingnie de cent hallebardiers, ainsy que leur fut rapporté de bouche par ceulx que l’en auroient requiz. A ceste cause, le lendemain ... jour de juillet, icelluy suppliant, accompaingnié de Malin HELYON ung des hallebardiers de notredit gouverneur, se transporta vers Hues DU BOSQUET seigneur de Bradimes lieutenant et capitaine de ladite compaingnie pour le advertir de la responce et promesse faite par icellui notre gouverneur d’Arras, affin que en temps et en lieu, il en eust mémoire s’aucune chose escheoit et qu’il le voulsist avoir pour recommande premier sondit compaingnon, et tost après retournèrent ensemble lesdicts HELYON et suppliant. Et certain temps après vindrent sur le marchié de notredite ville d’Arras où estoit ledit deffunct Symon LE CARON, lequel sitost qu’il a perceu ledit HELYON vint à luy de couraige esmeu et luy dit qu’il l’avoit blasmé audit capitaine et luy avoit dit que s’il estoit retenu en ladite compaingnie que d’ung mois il en seroit les trois sepmaines hors de la ville et qu’il avoit des empeschemens assez en sa maison sans estre gendarme. Ce veant ledit suppliant, contendant rompre l’yre dudit deffunct, s’approcha d’eulx ausquelz ledit deffunct s’adrescha et dit qu’ilz estoient bien traittres et desloyaulx de le avoir ainsy blasmé à son capitaine, disant de rechief qu’ilz luy avoient dit que s’il estoit retenu en ladite compaingnie, que d’ung mois il en seroit les trois sepmaines en sa maison. A quoy le suppliant respondit  doulcement que non avoit et qu’il le tenoit pour son amy et son voisin et qu’il ne le avoit blasmé ne mesdit de luy. Et au contraire ledit deffunct insistoit par parolles contre lesdits suppliant et HELYON, les démentist et, en jurant le nom de Dieu, respondist que si avoient et qu’ilz avoient dit mal de luy. Tellement que pour éviter plus grant noise aucuns des assistens les incitèrent et vouldrent induire à aler en la Maison Rouge estant sur ledit marchié disans que ledit capitaine Hues DU BOSQUET y estoit. A quoy se accordèrent lesdits suppliant et HELYON et de fait se misrent en voye pour y aler, affin de savoir quelle chose en diroit ledit capitaine.

Et ainsy qu’ilz aloyent ensemble ledit deffunct frappa de sa main ledit suppliant au visaige et luy donna ung soufflet, ce qu’il porta paciemment sans desgaingner son baston. Et ce fait en continuant en son arrogance icellui deffunct entortilla son paltot autour de son bras, desgaignant son espée lança après ledit suppliant et le attaindit sur la teste, toutesfois ne le navra tant à cause que ledit HELYON destourna le cop de sa hallebarde que au moyen du bonnet dudit suppliant qui rompit ledit cop. Et de fait contendit ledit deffunct grandement l’outraigier tant de cop d’estocq que autrement, tellement que ledict suppliant, pour soy garander et deffendre contre ledit deffunct, fut constraint de desgaigner ung veredon qu’il avoit et le présenta nud audevant dudit LE CARON lequel s’approchoit de plus en plus contendant oultraigier icellui suppliant. Parquoy ledit suppliant attaindist ledit deffunct d’un cop en la bouche tellement qu’il le percha tout oultre. Duquel cop par faulte d’appareil, bon gouvernement ou autrement ledit Symon LE CARON est alé de vie à trespas. (…)

Donné en notre ville de Bruxelles ou mois d’aoust l’an de grace mil cincq cens vingt et trois, et de noz règnes assavoir de cely des Romains et de Hongrie etc le IIII^e et des Espaingnes etc le VIII^e. Par l’empereur.

[il porta paciemment : il supporta patiemment ; paltot = paletot, justaucorps porté par les archers et laquais]