Siméon BERTELOT (2), à Arras

(AD59, B1741, folio 166)

En 1529 à Arras, Siméon BERTELOT tue d’un coup de poignard Robin MILLION à cause d’une dette de jeu et suite à des paroles blessantes.

Charles etc, savoir faisons à tous présens et avenir, nous avoir receu l’umble supplication de Siméon BERTELOT, povre homme chargié de femme et enffans natif de notre pays et conté d’Artois, contenant comme environ à huit ans dans le mois de janvier dernier passé XV^C XXIX, il se transporta en la maison de Henry GUYNOIS ès faulxbourgs de Moelens de la ville d’Arras lors à usage de cabaret. Auquel lieu estoient pluiseurs personnes et entre autres Jehan DESPONS, Robin MILLON à présent défunct, Jehan LENFFANT et autres qui jouoient aux detz comme le feist ledit supliant avec eulx. Et tellement jouèrent que ledit MILLION perdit tout son argent et feyt sa levée audit supliant de deux solz, dont il se malcontenta demandant pourquoy il emportoit son argent et qu’il luy debvoit ancoires deux solz de prest qu’il luy avoit fait en la maison de Crochette. A quoy ledit Robin MILLION fit response audit supliant ces motz : je fay le cul te mère, je ne te doy riens. Et ce oyant icelluy supliant haulcha sa main contendant donner ung soufflet audit MILLION ce qu’il ne feyt au moien qu’il fut empesché par ledit DESPONS. Et par le moien d’iceluy DESPONS se meirent d’accord ensemble tellement qu’ilz se rassirent à table, ledit DESPONS au milieu de eulx deux et recommencèrent à jouer. Et certayne temps aprez parolles se meurent entre ledit supliant et ledit Robin, en sorte que, à raison desdites parolles ledit supliant tira ung dollequin qu’il avoit à sa chainture, duquel il en frappa ung cop en l’aisne sénestre dudit feu Robin Robin MILLION, dont il fut bleschié à sang courant et plaie ouverte. Et soubit se partit ledit Siméon dudit cabaret et aprez sept sepmaines aprez ledit cop ou environ ledit Robin termina vie par trespas. (…)

Donné en notre ville de Malines ou mois de may l’an de grace mil cinc cens et trente et noz règnes assavoir des Romains en germanie le XI^e et de Castille etc le XIIII^e ; soubscript par l’empereur en son conseil ; signé DOUBLIOUL.