Sanson BEHAREL et Jasspar GOSSELIN , de Magnicourt-en-Comté

(AD59, B1739, folio 5)

En 1524 à Chelers, Sanson BEHAREL et Jasspar GOSSELIN sont impliqués dans le meurtre de Martin GODON, après une querelle de taverne, un des suppliants ayant déclaré qu’il n’aurait voulu boire à la santé d’un frère dudit Martin.

Charles etc, savoir faisons à tous présens et avenir, nous avoir receu l’umble supplication de Sanson BEHAREL et Jasspar GOSSELIN, josnes compaignons à marier, demeurans à Magnicourt en notre pays d’Artois, contenant comment le XXVIII^e jour d’aoust l’an XV^C XXIIII, se trouvèrent en la maison de Jehan LECLERCQ tavernier demeurant à Celers, feu lors vivant Martin GAUDON, avec Henry GAUDON et Ansel GAUDON dit Laulo, frères. Et pendant qu’ilz disnoient survindrent récréer et boire avec eulx Colin GOSSELIN, Artus ANDRY et lesdits suplians. Et en disnant beurent les dessusnommez pluiseurs fois l’un à l’autre, tellement que ledit feu Martin GODON bailla à boire du vin en une pinte audit Sanson supliant en luy disant ces mots : Sanson j’ay beu à vous, tenez plesgez moy. Lequel pot ledit supliant print disans ces motz : je vous plesgeray voulontiers. Et quant il eust beut, dit audit deffunct Martin : se c’estoit votre frère, je ne plesgeroye point, par ce qu’il m’a rompu deux ou trois dens en la bouche et sy ne luy avoye riens mesfait. Et incontinent après, lesdits suplians, Collin COSSELIN et Artus ANDRY se partirent desdits deffunct Martin et ses frères et allèrent jusques à la maison de Hugues FERCOT. Et tost après qu’ilz furent partiz de ladite chambre, lesdits deffunct Martin et ses frères dirent ensamble, ainsi que depuis on a rapporté ausdits suplians autrement ne le scevent : ces gens viennent icy pour nous menasser, allons après. Et voyant l’ostesse de la maison qu’ilz estoient si malcontens, doubtant qu’il ny eussist débat, enferma ledit deffunct Martin et ses frères en leur chambre. Lesquelz ce voyant jurèrent et blasphémèrent la mort de Notre Seigneur, disans que se on leur ouvrit l’huys, qu’ilz abateroient. Au moyen de quoy icelluy ostesse fut constraincte leur ouvrir l’huys. Et sitost qu’ilz furent dehors, ledit deffunct Martin print ung arcq et des flesches, Henry unne hallebarde et Ansel une picque. Et en ceste estat allèrent après lesdits suplians, Artus ANDRY, Collin et autres qui s’en retournoient en leurs maisons. Et voyans lesdits suplians que ledit deffunct Martin et ses frères les suyvoient, icelluy Sanson supliant dit audit Ansel GODON dit Laulo, par pluiseurs fois : Lolo où va tu, reviens en ton escot, nous ne te demandons riens ne à tes frères. Mais ce nonobstant ledit feu Martin commencha thirer sur lesdits suplians et leurs compaingnons et tira deux flesches l’une après l’autre tellement que de l’une d’icelles Jaspar COSSELIN supliant fut bleschié au genoul. Et voiant lesdits suplians et leursdits compaingnons que on tiroit sur eulx, retournèrent sur lesdits deffunct Martin et ses frères, que lors ledit feu Martin fut blessché en la cuysse d’une flessche, ne scevent lesdits suplians si s’est de leur fait ou non, combien que ledit sanson supliant avoit ung arcq. Duquel cop six sepmaines après ou environ, icellui feu par faulte de bon appareil ou autrement, seroit termié vie par mort.

Et jasoit que lesdits suplians soient très amérement dolans et repentans de l’advenue dudit cas, néantmoins doubtant rigeur de justice ilz se sont absentez de noz pays et seigneuries et n’y oseroient retourner, estre, converser ne demourer, ains les conviendra finer misérablement leurs jours en autres pays et contrées, se notre grace et miséricorde (…).

Donné en notre ville de Bruxelles, ou mois de janvier l’an de grace mil cincq cens vingt et sept, et de noz règnes assavoir des Romains et Germanie etc le IX^e et de Castille etc le XI^e ; par l’empereur en son conseil ; VERDE RUE visa.