Pierot de BÉCOURT, à Houvin

(AD59, B1735, folio 97)

En 1523 à Houvin, Pierot de BÉCOURT rencontre Jehan GRÉGOIRE qui a été mêlé au meurtre de son frère Jehan de BÉCOURT, et menace de le tuer. S’ensuit une bagarre et plusieurs personnes interviennent, dont Robert HECQUET qui est tué d’un vireton d’arbalète par ledit Pierot.

Charles, etc, savoir faisons à tous présens et avenir, nous avoir receu l’umble suplicacion de Pierot de BÉCOURT, demourant à Hovin en notre pays et conté d’Artois, contenant comme le jour de Saint Marc dernier passé, ledict supliant et Jehan de BÉCOURT son frère estoient lors au villaige de Houvin, et aprez disner que les vespres estoient dites, ledit Jehan non pensant à aucun mal rencontra auprez du cimontière de l’église dudict lieu ung nommé Jehan GRÉGOIRE, lequel trois sepmaines auparavant avoit esté présent où N… de BÉCOURT frère dudict supliant et dudict Jehan, avoit esté tué, dont ledict GRÉGOIRE n’avoit obtenu rémission ne fait paix à partie. Et le véant et non sachant refaindre son couraige, meu de courroux et de chaulde colle, faisant signe de tirer son espée dont il estoit garny, dit audit Jehan GRÉGOIRE ces motz ou en substance : deffend toy traistre, tu as tué mon frère. Quoy voiant et oyant, ung nommé Jehan BONNEL dit Ticquet, rua d’une pierre aprez icellui Jehan BÉCOURT, dont il l’asséna et blessa en la teste à sang courant et playe ouverte, que lors ledict Jehan soy sentant ainsi blessé, desgaigna incontinent sedicte espée et s’approcha dudict BONNEL pour lui cuider faire desplaisir. Ce véant, feu lors vivant Robert HECQUET beau-frère dudict Jehan BONNEL vint auprès dudict Jehan GRÉGOIRE et luy print et osta une rapière qu’il avoit en sa main, et à tout icelle vint assaillir ledict Jehan de BÉCOURT, et lui dit : par la mort Dieu, je te tueray, en ruant plusieurs cops sur ledict Jehan, lequel reculoit et se deffendoit au mieulx qu’il polt en disant : Robin, que me demande tu, je ne vous demande riens. Mais ce nonobstant, ledict Robin ne cessa de ruer aprez ledict Jehan, lequel tousiours se defendoit et ruoit après ledict Robin, et durant ledict débat, ledict supliant frère dudict Jehan, lequel estoit assez prez de de la maison de son père, et oiant dire que son frère estoit en grand dangier d’estre tué, accourut incontinent audict conflit et débat à tout une arbalestre bendée en sa main et un vireton dessus. Et lui illec venu et véant sondict frère blessié, non sachant qu’il avoit fait aussi que ledict Robert ne desistoit de ruer sur icelui Jehan son frère, se mist en devoir de desserrer sondict arbalestre sur le dict Robin. Mais Peirotin BÉCOURT frère aussi dudict supliant qui n’estoit présent, sans qu’il n’estoit aucunement meslé dudict débat, lui empescha par deux ou trois fois, néanmoins ledict supliant en criant et disant : se garde qui veult, tira et desserra sondict arbalestre sur ledict Robin, lequel il attaindi au costé dont icellui Robin tumba par terre et termina lendemain vie par mort.(…). Donné en notre ville de Malines, le vendredi Saint ou mois de mars l’an de grace mil cincq cens vingt et trois, et de noz règnes asavoir des Romains et Hongrie le cinquiesme, et des Espaignes et autres le huitiesme ; par l’empereur en son conseil ; signé Darthe.