Florens BAUDUIN, à Arras et Béthune

(AD59, B1735, folio 48v)

Dans la présente lettre de rémission, le suppliant Florens BAUDUIN est concerné par deux homicides, dont l’un commis par lui.

En 1522 à Arras, Florens BAUDUIN accompagné de Phot WAGHET, reproche à Baudrain CAMP de frapper trop fort à une porte dans la rue. Après une querelle, Baudrain CAMP est tué par Phot WAGHET. Florens doit alors se retirer à Béthune, où il est archer.

Plus tard, il boit dans une taverne à Béthune, avec un autre archer dont le nom est inconnu. Ce dernier se fâche parce que Florens BAUDUIN ne veut boire davantage. Une rixe éclate alors, et l’archer querelleur est tué par Florens.

Charles, scavoir faisons à tous présens et avenir, nous avoir receu l’umble supplicacion de Florens BAUDUIN, josne filz à marier éagié de vingt cincq ans ou environ, contenant comme le XXV^e jour de juillet dernier passé en cet an mil cincq cens vingt trois, à neuf heures du soir, icellui suppliant se seroit trouvé en notre ville d’Arras, auprez du Coulot Saint Aubert, accompaigné de François ENLART natif dudict Arras, et de Phot WAGHET sergant de la gouvernance d’Arras, lequel supliant et autres rencontrèrent ung Michel de PARIS, Colin LE FER, Baudrain CAMP à présent deffunct, et Jennet LE MERCHIER, lesquelz de PARIS et CAMP busquoient à ung huys de ladicte rue. Et lors icellui suppliant leur dit ces motz : busquez bas, ce n’est point ung bordeau. A quoy icellui de PARIS respondit audict suppliant ces motz : passez oultre, ou aultrement je vous monstreray qu’il m’en desplaira. Et incontinent ledict supliant et ses compaignons, pour éviter noise, se départirent et s’en allèrent vers l’ospital Saint Jehan tout au long de la rue, et fut icellui suppliant contraint d’aller faire sa nécessité auprez dudict hospital Saint Jean. Et lesdicts ENLART et WAGHET se retirèrent par derrière ledict hospital par une ruelle qui maisne au pont Saint Vaast, et trouvèrent à la porte derrière dudict hospital lesdicts de PARIS, Baudrain CAMP, et Collin LE FER et Jennet LE MERCHIER. Et lors ledict de APRIS dist audict ENLART : ne te abstiendras tu jamais de venir icy ? Et en jurant la mort de Notre Seigneur desgaigna son baston disant ces motz : je ay envye de me batre aurjourd’huy à toy. Et lors ledict Baudrain desgaigna aussi son baston. A quoy iceulx ENLART et WAGHET respondirent ces mots : nous ne vous demandons riens. Néantmoins ledict de PARIS non content de ce, dit audict ENLART qu’il se deffendit. Et ce fait ledict de PARIS et Baudrain son compaignon, ruèrent sur lesdicts ENLART et WAGHET. Et lors, icellui suppliant qui sievoit ses compaignons, survint sur ladicte noise et pour les desmesler rua sur ledict Michiel de PARIS d’une javeline qu’il tenoit et ce seullement du bois, duquel cop le fer d’icelle javeline cheyt à terre, et ne fist aucunement sang audict PARIS. Quoy veans lesdicts ENLART et WAGHET se mirent en fuyte, et incontinent icellui supliant fut débastonné de sadicte javeline, et d’un estocq qu’il avoit en fut fort bleschié en la main dextre et au genoul. Et ce fait commença à cryer après lesdicts ENLART et WAGHET en disant ces motz : me lairez vous tuer, je me suis mis en dangier pour vous ? Aprez lesquelles parolles lesdicts ENLART et WAGHET retournèrent pour secourir audict suppliant et ruèrent sur lesdicts de PARIS et Baudrain CAMP, tellement que ledict WAGHET frappa deux cops d’estocq audict Baudrain CAMP, l’un ou corps, l’autre au front, au moyen desquelz cops ledict Baudrain CAMP huit jours aprez ou environ, par faulte de bon appareil ou autrement, termina vie par mort.

Pour lequel cas icellui supliant certains jours après a esté semons sur la teste de notredite ville d’Arras a touiours, au moyen de quoy icellui suppliant se seoit parti d’icelle ville, et allé résider à Béthune, où il auroit esté receu en notre service comme archier à deux chevaulx, doubz la charge du conte d’Espinoy, où il se seroit acquitté à son povoir jusques environ le mois de septembre enssuivant, que ledict supliant estant ès faulxbours dudict Béthune, accompaigné d’un nommé N … archier de ladicte compaignie et d’un sien frère, allèrent boire ensemble en la maison de Guyot d’ARRAS carbartier demourant èsdicts faulxbours de Béthune. Et quant ilz olrent beu icellui supliant se voulut partir disant : nous avons icy assez beu. A quoy lesdicts frères lui dirent qu’il buvroit encoires et que le jour précédent les avoit enyvré, parquoy le vouloient enyvrer ledict jour. A quoy icellui suppliant ne volut consentir , disant qu’ilz avoient tous assez beu, et lors icellui deffunct dit audict supliant tout courroucé ces motz : par la mort Dieu tu beuvras. Et en ce disant desgaina son espée et frappa sur ledict suppliant d’un cop d’estocq en la poitrine, duquel cop icellui suppliant fut bleschié à sang courant et playe ouverte. Et encoires non content, ledict deffunct relancha derechief aprez ledict suppliant et sondict frère print ung pot estant sur ladicte table pour le ruer aprez icellui suppliant. Quoy voiant icellui suppliant pour garandir sa vie, et en soy deffendant, frappa sur ledict deffunct d’un cop d’estocq aussi en la poitrine, dduquel cop tantost par faulte de bon et brief appareil ou autrement il seroit allé de vie à trespas. (…)

Donné en notre ville de Malines le jour du Vendredi Saint ou mois de mars l’an de grace mil cincq cens vingt et trois, et de noz règnes assavoir de cellui des Romains et Hongrie le cincquiesme et des Espaignes le huitiesme ; par l’empereur en son conseil ; signé Darthe.

[busquer à ung huys = frapper à une porte ; laier = laisser ; semons = obligé de quitter ; ruer = porter un coup ; estocq = épée longue et droite ; cop d’estocq = coup droit de la pointe de l’épée]